Қаржылық мониторинг агенттігі бұрынғы Мәжіліс спикері Нұрлан Нығматулиннің ұлы Нұржан Нұрлановқа қатысты іс бойынша кейбір мәліметтерді жариялады, деп хабарлайды Todayinfo.kz.
Бұған дейін БАҚ беттерінде Нұржан Нұрлановқа қатысты қылмыстық іс тергеліп жатқаны туралы ақпарат тараған еді. Ішкі істер министрлігі журналистердің сауалына Алматы полициясының аталған факті бойынша ҚР Қылмыстық кодексінің 389-бабы («Өз бетімен билік ету») бойынша сотқа дейінгі тергеу жүргізіп жатқанын хабарлаған болатын.
Аталған бап бойынша ең төменгі жаза – 80 АЕК (2025 жылы 314 560 теңге) көлемінде айыппұл, ең жоғары жаза – қылмыстың ауырлығына қарай 3 жылдан 7 жылға дейін бас бостандығынан айыру.
Кейінірек Бас прокурордың орынбасары Ғалымжан Койгелдиев Нұрлановқа қатысты полицияға өтініштер түскенін, қазіргі уақытта бұл арыздар қарастырылып жатқанын айтқан. Оның қазіргі статусы нақты айтылған жоқ. Ал БАҚ-та оның күдікті статусында емес екені жайлы мәлімет тарады.
Қаржы мониторингі агенттігінің (ҚМА) хабарлауынша, істі Алматы қаласы бойынша экономикалық тергеп-тексеру департаменті қарауда. Агенттік Tengrinews.kz-ке берген ресми жауабында, бұл іс рейдерлік (ҚР ҚК 249-бабы) бойынша тергеліп жатқанын мәлімдеді.
Рейдерлік үшін Қазақстанда белгіленген жаза – ең төменгісі 5 мың АЕК (19,6 млн теңге) көлемінде айыппұл, ал ең жоғарғысы – қылмыстың ауырлығына қарай 8 жылдан 12 жылға дейін бас бостандығынан айыру.
Нұржан Нұрланов 1988 жылдың 10 мамырында дүниеге келген (36 жаста). Ол Лондонда American InterContinental University университетінде «бизнес-әкімшілік» мамандығын тәмамдаған, кейіннен Уэльс университетінің магистратурасын аяқтаған.
Еңбек жолын 2011 жылы KAZNEX INVEST ұлттық агенттігінде менеджер болып бастаған. Кейін премьер-министр кеңсесінде сарапшы, «ҚазТрансГаз Аймақ», «ҚазТрансГаз» компанияларында басшылық қызметтерін атқарған. Сонымен қатар, «Бәйтерек» ұлттық басқарушы холдингінде басқарушы директор болған.
2019-2022 жылдары «ҚазМұнайГаз-Аэро» ЖШС-нің бас директоры қызметін атқарды. Сондай-ақ, «ҚазТрансГаз», «ҚазРосГаз», «Амангелді Газ», «Бәйтерек девелопмент» сияқты компаниялардың директорлар кеңесінің мүшесі болған.
Нұрлан Нығматулин – 2016 жылдың маусымынан 2022 жылдың ақпанына дейін Мәжілістің төрағасы қызметін атқарған.
Арғын Нығматулинге қатысты тергеу
Ал Нұржанның ағасы Арғын Нығматулинге қарсы нақты қылмыстық іс қозғалған.
Бас прокуратураның хабарлауынша, Арғын Нығматулин және басқа да тұлғаларға қатысты ҚР ҚК 189-бабының 4-бөлігі, 2-тармағы («Сеніп тапсырылған бөтен мүлікті иемдену немесе ысырап ету») бойынша сотқа дейінгі тергеу жүргізілуде. Арғын Нығматулин қамауға алынған және іздеу жарияланған.
Оған қатысты істің мәні Қарағанды облысында хоккейді дамытуға бөлінген бюджеттік қаражатты жымқырумен байланысты болып отыр. Іздеу ісі 2025 жылдың 3 наурызында тіркелген. Арғын Нығматулин 2007-2018 жылдары «Сарыарқа» хоккей клубының директоры болған.
