Фото: istockphoto.com
Мәжіліс депутаты Еділ Жаңбыршин бұралқы иттер мәселесін жүйелі түрде шешу қажеттігін көтерді, деп хабарлайды Todayinfo ақпарат агенттігі.
«Біз адамдарды қорғауымыз керек. Менде көптеген фактілер бар. Оның ішінде балалардың бетін тістеп алған жағдайлар бар, ал бір астаналық тұрғынның өкшесін жұлып, кейін мүгедек болғаны туралы мәлімет бар. Сондықтан көшеде ешқандай бұралқы ит жүрмеуі тиіс. Әрине, әр жағдайды мұқият тергеп-тексеру қажет. Қазіргі заң бойынша атуға немесе арнайы дәрімен ұйықтатуға тек агрессия көрсеткен ауру иттерге ғана рұқсат етілген», – деді депутат мәжіліс кулуарында.
Бұған дейін Еділ Жаңбыршин Үкімет қаңғыбас иттер мәселесін жүйелі түрде шешуі тиіс екенін айтып, заңға өзгеріс енгізуді талап еткен болатын.
Ресми мәліметтерге сәйкес, жыл сайын Қазақстанда 38 мыңнан астам адамды ит қабады. Бұл күніне 104 адамның бұралқы иттердің шабуылына ұшырайтынын білдіреді, олардың жартысына жуығы – 14 жасқа дейінгі балалар.
Қоғамда бұралқы иттерді аулау, оларды ұйықтату немесе арнайы баспаналарға орналастыру мәселесі қызу талқыланып келеді. Бұл ретте билік пен қоғам арасында тиімді шешім қабылдау қажеттігі туындап отыр.
