Қаржы мониторингі агенттігінің Шығыс Қазақстан облысы бойынша департаменті Бас көлік прокуратурасының үйлестіруімен «Өскемен әуежайы» АҚ-ның бұрынғы басшыларына қатысты қызметтік өкілеттіктерін асыра пайдалану, аса ірі көлемде сеніп тапсырылған мүлікті иемдену, сондай-ақ қылмыстық жолмен алынған қаражатты заңдастыру фактілері бойынша тергеуді аяқтады. Бұл туралы Todayinfo ақпарат агенттігі хабарлайды.
Еңбекақыны негізсіз көбейтіп, жалған сыйақы берген
Тергеу мәліметтері бойынша, бес жыл бойы акционерлік қоғамның бұрынғы президенті мен өзге де лауазымды тұлғалары жүйелі түрде ақша жымқыру әрекеттерін жүзеге асырған. Олар еңбекақыны негізсіз арттырып, жалған сыйақы мен шарттар арқылы заңсыз табыс алған. Жымқырылған қаражат касса арқылы қолма-қол ақшаға айналдырылып отырған.
Активтер төмен бағамен сатылып, мүлік есептен шығарылған
Қоғамға тиесілі көлік құралдары бухгалтерлік есептен шығарылып, олар нарықтағы бағасынан бірнеше есе арзанға сенімді тұлғаларға сатылған. Бұл әрекет компания мүлкінің заңсыз иеленуіне алып келген.
Коммерциялық нысандар жеңілдетілген шартпен жалға берілген
Тергеу нәтижесінде «Өскемен әуежайы» АҚ-ға тиесілі коммерциялық нысандардың жалға берілу кезінде заңбұзушылықтар болғаны белгілі болды. Атап айтқанда, жалдау ақысы төмендетіліп, нақты жалға берілген аумақ азайтылып көрсетілген.
Мемлекетке келген шығын – 157 миллион теңге
Жоғарыда аталған әрекеттердің салдарынан мемлекетке келтірілген жалпы залал 157 млн теңгені құрады. Тергеу аясында күдіктілердің 126 млн теңге көлеміндегі мүлкіне – 4 пәтер, жер учаскесі және 2 автокөлікке – сот санкциясымен тыйым салынды.
Күдіктілер қамауға алынды
Қазіргі таңда күдіктілер қамауға алынған. ҚР Қылмыстық-процестік кодексінің 201-бабына сәйкес, тергеуге қатысты өзге мәліметтер жария етілмейді.
