Парламент Мәжілісінің депутаты Еділ Жаңбыршин өзінің әріптесі Әділ Жұбановқа жала жабылғанын, ақпараттық шабуылдар басталғанын мәлімдеді. Ол қиын кезде халыққа, елге көмек берген депутатқа биліктің араша түспегенін ашық айтты, деп хабарлайды Todayinfo.
Депутаттың сөзінше, қатал сын айтқан жағдайда шабуылға ұшырау өзге әріптестерінің де басынан өткен.
«Әділ Жұбанов өте таза және мықты депутат. Кейбір жалдамалы блогерлер мен журналистердің Әділ Орынбасарұлы туралы жазғандары таза тапсырыс. Өйткені ол өткенде “Самұрық-Қазына” Әл-ауқат Қорын қатты сынға алды. Шабуыл содан кейін басталды.
Әділдің қандай әділ және еліне жаны ауратын азамат екенін өткен жылғы су тасқынында көрдім. Атырау облысының Махамбет ауданында елді-мекендерді тасқын судан алып қалу үшін қыруар қаржы бөліп, көптеген арнайы техникаларды жұмылдырды. Қиналған елдің ортасында жүрді. Менің парақшамда ол жұмыстары жарияланды», -деп жазды ол.
Халық қалаулысының сөзінше, қазір «шайтани» ойындарды ойнау, беделді адамдарды пайдалану кең етек алған.
«Қиын кезде Мәжіліс депутаты Әділ Жұбанов билікке керек болады да, оған ақпараттық шабуыл басталғанда билік неге үнсіз отырады?! Үнсіз отыру блогерсмақтарды қолдау емес пе?!
Бұл жалғыз Әділ Жұбановтың басындағы мәселе емес. Мұндай жағдай көптеген елге жанашыр депутаттар мен кәсіпкерлердің басында да бар.Керек кезінде ел ішінде беделді адамдарды пайдаланады, ал оларды «құрту» үшін әдейі ақпараттық шабуыл басталса билік үнсіз қалады! Осындай шайтани ойындарды тоқтататын уақыт келді. Әйтпесе ел басына күн туғанда, бас көтеретін адам таппай қаласыңдар!
Қолда бар алтынды бағалай білу керек!», -деп жазды депутат Еділ Жаңбыршин.
