Фото: BAQ.KZ
Белгілі баспагер Бақытжан Бұқарбай жазушы Дулат Исабековтің асында айтылған ерсі әңгіме туралы өз пікірін білдіріп, әлеуметтік желідегі парақшасында жазба жариялады,деп хабарлайды
Todayinfo.
Оның айтуынша, қаралы жиында сөз алған Ханбибі Есенқарақызы марқұмның артында қалған отбасына көңіл айтудың орнына, өзінің мемлекеттік сыйлық ала алмай жүргеніне шағымданған.
«Қаралы жиындарда зиялы санатына жататын ағаларымыз бен апаларымыздың өзін ұстауы мен сөйлеген сөзі кейде «Бұл қалай сонда?» деген ойға қалдырады. Дулат Исабековтің асында сөз алған Ханбибі Есенқарақызы өзінің марапат ала алмай жүргенін айтты. Бұл сөзі тым әдепсіз көрінді», – деп жазды Бұқарбай.
Сондай-ақ, баспагер астада тек естелік айтылуы керектігін ескертіп, бұл жағдайдың бұрын да қайталанғанын атап өтті.
«Бұған дейін де осындай көріністер болған. Бір аста сөз алған Смағұл Елубай марқұм туралы естелік айтып, артында қалған ұрпағына жылы тілек білдірудің орнына, қазіргі президентті мадақтауға біраз уақытын арнады. Бұрынғы басшыны да дәл осылай дәріптеуші еді. Бұл өте жиіркенішті көрініс болды»,– деді ол.
Баспагер аға буын өкілдерін жастарға үлгі болуға шақырып, қаралы жиындардың мәні өзгеріп бара жатқанын баса айтты.
