Фото: Қарағанды облысының әкімдігі
Қарағанды облысында әр салада адал еңбек етіп жүрген қарапайым еңбек адамдарына құрмет көрсетілді. Жұмысшы мамандықтар жылында түрлі салада еңбек етіп жүрген адамдар жеті түрлі номинация бойынша марапатталды, деп хабарлайды Todayinfo порталы.
«Адал азамат» жобасына Қазақстан халқы ассамблеясы жанындағы облыстық Ақсақалдар кеңесі ұйытқы болды. Мемлекет басшысы атап көрсеткен «Адал азаматқа» тән еңбекқорлық, шыншылдық, отаншылдық, кәсібилік, жауапкершілік, әділдік, үнемшілдік сияқты ізгі қасиеттерге ие еңбеккерлер арнайы жүлдемен және қаржылай сыйақымен марапатталды.
«Ең бастысы, олар – өз ісінің шебері, адал еңбекпен елдің ырысын көбейтіп жүрген қарапайым азаматтар. Облыс әкімі Ермағанбет Бөлекпаев атап өткендей, осындай адал азаматтар – әділетті, берекелі және бәсекеге қабілетті мемлекеттің басты қозғаушы күші», — деді Қарағанды облысы әкімінің орынбасары Әлібек Әлденей.
«Әділдік сақшысы», «Ұлағатты ұстаз», «Мәдениет майталманы», «Ерен еңбек иесі», «Ізгілік жаршысы», «Абзал жан», «Ержүрек құтқарушы» атты номинация бойынша үздіктерге ел алдында құрмет көрсетілді.
Салтанатты шара Қазақстан халқы ассамблеясының 30 жылдығы аясында ұйымдастырылып отыр. Іс-шарадан кейін Республикалық ақсақалдар кеңесі өтті.
«Онда еліміздің түкпір-түкпірінен келген ел ағаларымен бірге жастарды «Адал азамат» құндылықтарына сай тәрбиелеу жөнінде пікір алыстық. Бұл бағытта алдағы уақытта «Ұлт қазынасы» деген жобаны қолға алмақпыз. «Адал азамат» деген мәртебелі жүлдені тапсыруға арнайы келген, өздері де осы абыройлы атаққа лайық аға буын өкілдері – Сәт Тоқпақбаев, Жамбыл Артықбаев, Бүркітбай Аяған сияқты қайраткер ағаларымызға айрықша ықыласпен рахмет айтамын», -деді облыс әкімінің орынбасары.
