Премьер-министр Олжас Бектенов «Digital Almaty 2025» форумында 2030 жылға қарай жасанды интеллект әлемдік экономикаға шамамен 20 триллион доллар үлес қосатынын мәлімдеді, деп хабарлайды Todayinfo.kz агенттігінің тілшісі.
Премьердің айтуынша, жасанды интеллект ЖІӨ-ні жылына 2-3% өсіруге қабілетті, және ЕАЭО елдерінің экономикасын дамыту үшін осы бірегей мүмкіндікті пайдалану керек.
— Мемлекет басшысы Қасым-Жомарт Кемелұлы Тоқаев Alem.ai халықаралық жасанды интеллект орталығының негізінде құзыреттілік экожүйесін құруды бастамашылық етті. Бұл орталық биыл Астанада ашылады. Бұл жетекші IT-компаниялар, зерттеу зертханалары, стартаптар мен білім беру бағдарламаларын бір алаңда біріктіруге мүмкіндік береді, олар бірлесіп шешімдер әзірлейді. Біз ЕАЭО елдерінің күштерін Alem.ai орталығы базасында жасанды интеллект саласында бірлескен жобаларды жүзеге асыруда біріктіруді ұсынамыз, — деді Олжас Бектенов.
Сонымен қатар, ол жасанды интеллектті күнделікті өмірде тиімді пайдалану үшін тек IT-мамандарын ғана емес, кешенді түрде оқыту маңызды екенін айтты.
— Сондықтан біз алдымызға қойған амбициозды мақсат — келесі бес жыл ішінде Қазақстанда осы салада 1 миллион адамды оқыту, — деп толықтырды Премьер.
Бұған дейін мемлекет басшысына Nur Alem аумағында орналасатын AlemAI жасанды интеллект орталығының концепциясы таныстырылған болатын.
