2025 жылдың алғашқы айларында Kaspi.kz платформасындағы Magnum онлайн супермаркеті арқылы 5,3 миллион жылдам жеткізу онлайн тапсырысы орындалды. Бұл туралы Kaspi.kz басшысы және тең құрылтайшысы Михаил Ломтадзе премьер-министр Олжас Бектеновке баяндады, деп хабарлайды Todayinfo.kz.
800 мың қазақстандық онлайн супермаркет арқылы тапсырыс берді
Ломтадзенің айтуынша, 800 мыңнан астам қазақстандық Kaspi.kz платформасы арқылы азық-түлік және басқа да күнделікті тұтыну тауарларына онлайн тапсырыс берген. Жеткізу қызметінің жоғары жылдамдығы мен ыңғайлы интерфейс электронды сауданың дамуына серпін беріп отыр.
Сатылымның 50%-ы отандық өнімдер
Magnum онлайн супермаркеті арқылы жасалған сатылымдардың жартысынан астамы отандық өнімдерге тиесілі. Бұл – қазақстандық тауар өндірушілерді қолдау мен ішкі нарықты дамытудағы маңызды көрсеткіш.
5 млрд теңге салық түсті, 4,5 мың жұмыс орны ашылды
Онлайн платформа мемлекет бюджетіне 5 миллиард теңге көлемінде салық түсірді. Оның 2,4 миллиарды тек 2024 жылы төленген. Сонымен қатар, 4,5 мың жаңа жұмыс орны құрылған.
13 миллиард теңгеге заманауи қойма салынды
Премьер-министр Олжас Бектенов Алматыдағы жұмыс сапары аясында электронды коммерция инфрақұрылымымен танысты. Ол Magnum E-commerce Kazakhstan компаниясының Dark Store форматындағы заманауи қоймасына барып, логистикалық хабтың жұмысын көрді.
Аталған қойма тәулігіне 18 мың тапсырысты өңдей алады. Бұл — қызмет көрсету сапасын арттырып, электронды сауданың тиімділігін еселейді. Жалпы, инвестициялық жобаға 13 миллиард теңге бағытталып, 800 жаңа жұмыс орны ашылған.
Электронды сауда 5 есеге өсіп, 3,2 трлн теңгеге жетті
Соңғы деректерге сәйкес, Қазақстандағы электронды сауда көлемі соңғы 5 жылда 5 есеге артып, 2024 жылы 3,2 триллион теңгеге жеткен. Қазіргі таңда e-commerce жалпы бөлшек сауданың 16,6%-ын құрап отыр.
