Композитор Қалдыбек Құрманәлінің қызы Әнарумен болған дау әлі де жалғасып жатыр. Белгілі заңгер Ләззат Ахатова бұл іске қатысты алғаш рет бүкпесіз мәлімдеме жасап, оқиғаның қалай басталғанын ашып айтты, деп хабарлайды Todayinfo.kz ақпарат агенттігі.
«Осы уақытқа дейін ауру адамды аяп, үндемей келгем. Бірақ менің абыройыма күйе жағып, жалған ақпарат таратқаннан кейін жазуға тура келді. Адвокаттық құпияны да сақтадым. Алайда, енді өз арым мен абыройыма нұқсан келгендіктен, бәрін ашық айтамын», – деді Ахатова.
Оның сөзінше, бәрі әлеуметтік желіден Әнарудың сұқбатын көруден басталған. Қыз өзін спортшы зорлады деп мәлімдегеннен кейін, ана ретінде жанашырлық танытып, қолдау білдірген. Кейіннен Әнарудың әкесі Қалдыбек Құрманәлі хабарласып, адвокат болуын өтінген. «Мен ешқашан гонорар сұраған емеспін, тегін көмектестім. Бірақ «1 млн теңге бердік» деген сөздері – жалған», – дейді ол.
Ахатова бұл іске Нұрлан есімді бұрынғы сот төрағасының да араласқанын, оның өтініші бойынша Әнаруға қолдау көрсеткенін айтты.
«Мен Қалдыбектен де, қызы Әнарудан да ешқандай ақша алған жоқпын. Қайта тегін көмектестім. Бірақ олар мені қаралап, жалған ақпарат таратқаны үшін енді сотқа беремін. Әкесі мен қызынан 10 млн теңге моральдық шығын өндіремін», – деді ол.
Заңгер қолындағы скриншоттарды да жариялайтынын ескертіп, бұл істің жалғасы болатынын айтты.
