Белгілі коуч-психолог Құралай ханым продюсер Мөлдір Мұқан түсірген фильмді қолдаймын деп даудың ортасына түсті. Желі қолданушылары оның киноға дөрекі түрде шақырған жазбасын сынға алды, деп хабарлайды Todayinfo.kz.
Психолог өзінің парақшасында Мөлдір Мұқанның фильміне барып келгенін айтып, көпшілікті киноны қолдауға үндеді.
«Мөлдірдің киносынан жаңа шықтым. Қай қазақ болса да тырмысып, еңбек етіп жүргенін көру – мен үшін мақтаныш. Ештеңе істемей, тек диванда жатып сын айтатындар, Отанды жемеу үшін, 3 мың теңгеге бола шуламай, барып қолдаңдар Мөлдірді», – деп жазды ол.
1,5 млн оқырманы бар блогердің бұл сөздері бірден кең таралып, желіде үлкен резонанс тудырды.
Желі қолданушылары Құралай ханымның жазбасын орынсыз, тұрпайы деп бағалап, оған бірнеше уәж келтірді.
«Отан сөзін бұлай қорлайтындай сіз кімсіз? 3 мың теңгені халықтың қалтасына сіз салып беріп отырсыз ба? Кімді қолдайтынын әр адам өзі шешеді. Халыққа «зарлама» деп қиқулап сөйлеуге құқыңыз жоқ. Әркім киноны да, басқа дүниені де өз пайдасы үшін жасайды. Міндет қылмасын», – деп жазды қолданушылардың бірі.
Тағы бір тұрғын 3 мың теңгенің кейбіреулер үшін бір күндік жалақы екенін еске салды.
«Әр қазақ осы 3 мың теңгені табу үшін күні бойы жұмыс істейді. Бұл – біреу үшін күндік нәпақа. Ал сіз менсінбей отырған «дивандағы сыншылар» сол кассаға ақша құйып отырған адамдар. Кино түгілі, күнкөрісін әрең өтеп жүргендер бар», – деп жазды ол.
Сондай-ақ жалғызбасты ана да пікір білдіріп, танымал адамдардың халықтан қолдау талап ететініне таңғалатынын айтты.
«Төрт баламен қалғанмын. Пәтер жалдап тұрамын, несиемді жаба алмай жүрмін. 4 баланың жәрдемақысы мен 60 мың алиментпен күнімді көремін. Ешкімнен ақша сұрамаймын. Ал жағдайы менен әлдеқайда жақсы адамдардың жылап-сықтағанын түсінбеймін», – деді ол.
Айта кетейік, Мөлдір Мұқан жақында Тұрсынбек Қабатовқа қатысты сұхбатынан кейін желіде кең талқыланып, дәл сол уақытта өзінің авторлық фильмін прокатқа шығарды. Ал Құралай ханымға қатысты сын бұған дейін де бірнеше рет болған – ол қыз-келіншектерге бай болу, «әдемі өмір» жайлы курстар сатып, кей тұста зорлықты ақтады деген айыппен хейтке қалған.
