Астанада Халықаралық отбасы күніне орай ағаш отырғызу акциясы өтті. Іс-шараны қала әкімдігі мен «Қазақстан Даму Ассоциациясы» заңды тұлғалар бірлестігі бірлесіп ұйымдастырды, деп хабарлайды елорда әкімдігінің ресми сайтына сілтеме жасап Todayinfo.kz.
Бұл шара, ең алдымен, отбасылардың бірлігін нығайтуға, жағымды атмосфера қалыптастыруға және елорда тұрғындарын отбасылық демалысты белсенді өткізуге тартуға бағытталған.
Іс-шара елордалық Ботаникалық бақта өткен «Мерейлі отбасы» ұлттық байқауы аясында ұйымдастырылды.
«Біз былтыр “Мерейлі отбасы” байқауына қатысып, жүлделі орын алдық. Биыл бұл дәстүрді жалғастырып жатырмыз. Біз отбасымызбен Халықаралық отбасы күніне арнайы келіп, ағаш отырғызуға қатысып жатырмыз. Мен жұбайым және қызыммен келдім, қалған балаларымыз мектепте. Бұл өте маңызды акция деп есептеймін. Ұрпақтар сабақтастығы болуы керек. Біз ағаш отырғызамыз, олар өседі, ал кейін немерелеріміз келіп, бұл ағаштарды аталары мен әжелері еккенін білетін болады», – деді акция қатысушысы Руслан Кунакбаев.
Айта кетейік, «Мерейлі отбасы» ұлттық байқауы Қазақстанда жыл сайын отбасы институтын нығайту, адамгершілік пен жауапты некенің маңыздылығын тану; ата-аналардың балалар тәрбиесіндегі жауапкершілігін арттыру; отбасылық құндылықтарды насихаттау мақсатында өткізіледі.
«Бүгін Отбасы күні, сол себепті біз әкімдікпен бірлесе отырып ағаш отырғызуды ұйғардық. Бұл – қаланың экологиясын қолдау. Біз қаламыз тыныстап, отбасыларымыз гүлденіп, дамыса дейміз. Бұл – өте мәнді шара деп санаймын. “Мерейлі отбасы” аясында біз осындай акция өткізіп жатырмыз және бұл жыл сайынғы дәстүрге айналады деп ойлаймын. Мұндай іс-шаралар арқылы балаларымызды табиғатты қорғауға, болашақ үшін жауапкершілікке үйретеміз. Алдағы уақытта мұнда үлкен әрі көрікті отбасылық аллея пайда болады», – деді Астана қаласы әкімінің жанындағы әйелдер істері және отбасылық-демографиялық саясат жөніндегі қалалық комиссия мүшесі Баян Тойкебаева.
