Алматыдағы ЖОО-ның әкімшілігі студент қыздардың пәктігіне қатысты ақпараттың таралуы бойынша қызметтік тексерісті бастады, деп хабарлайды Todayinfo агенттігі Qumash telegram каналына сілтеме жасап.
Мәжілістің жалпы отырысының кулуарында Ғылым және жоғары білім министрі Саясат Нұрбек пәк студент қыздардың тізіміне қатысты пікір білдірді. Осыған дейін Qumash telegram-каналында Алматыдағы ЖОО-ның студент қыздарына қатысты ақпарат жарияланды. Онда оқу орнындағы пәктігі сақталған студент қыздардың тізімі тараған еді. Ғылым және жоғары білім министрі Саясат Нұрбек жеке деректерді, әсіресе медициналық сипаттағы деректерді беру бұзушылық екенін атап өтті.
«Мәселе бақылауға алынды, өйткені мұнда тікелей бұзушылық бар. Кінәлілер қолданыстағы заңнама аясында жазаланады деп күтілуде. Жеке деректерді қорғау туралы заң бар. Бұл жерде әкімшілік құқық бұзушылық туралы сөз болуы мүмкін», — деп атап өтті Нұрбек.
Ол мұндай ақпараттың таралуын жеке мәліметтерге деген салғырттық деп санайтынын айтты. Ал аталған университет, тізімді тарату оқиғасы бойынша қызметтік тексерістің басталғанын мәлімдеді. Одан бөлек құзырлы органдарға шағым түсіргендерін, әрі оқу орнына медициналық қызмет көрсететін клиникамен келісім шартты үзуді де қарастырып жатқандарын хабарлады.
«Бұл мәселені заңнамалық тұрғыдан қатаң реттеу қажет екенін мойындау керек. Жалпы, бұл мәдени мәселе. ЖОО-да осындай фактілер бар екені өкінішті. Жеке деректер өте құпия ақпарат болып табылатыны туралы қатаң заңнамалық қатаң императив болмайынша, мәдениет өзгермейді», — деп түйіндеді министр.
Тізімде екі жүзге жуық қыздың аты-жөні көрсетілген. «Qumash» телеграмм-каналындағы студенттерге қатысты ақпаратқа орай әл-Фараби атындағы Қазақ Ұлттық университеті де мәлімдеме жасады.
«2024 жылғы 6 ақпанда университетке келісім-шарт негізінде медициналық қызмет көрсететін «Smart Health University City» ЖШС медбикесі What’s app мессенджері арқылы механика-математика факультетінің флюорографиялық зерттеуден өтпеген 3-4 курс студенттерінің Excell форматындағы құжаттарын факультет деканатының маманы жіберген.
«Алайда, берілген құжаттарда студенттердің тегі мен аты-жөнінен басқа, медициналық құпияға қатысты мәліметтер де болған. Кейіннен университет студенттеріне қатысты дәрігерлік құпияны құрайтын дербес деректер мен мәліметтер мессенджерлер арқылы тарап кеткен. Осы факт бойынша 2024 жылғы 14 ақпанда университетте қызметтік тексеру тағайындалды. Сонымен қатар Алматы қаласының прокуратурасына осы факт бойынша прокурорлық әрекет ету шараларын қабылдауды және студенттердің құқықтарын қорғауды қамтамасыз етуді сұрап өтініш жолданды. Университет «Smart Health University City» ЖШС-мен шартты бұзу туралы мәселені қарастыруда», — деп хабарлады университеттің баспасөз қызметі.
