Қаржылық мониторинг агенттігінің мәліметінше, 2025 жылдың 23 қаңтарында Biz Birgemiz қорының экс-басшысы Перизат Қайратқа қатысты мүгедек балаларға арналған оңалту орталығын салуға ақша жинау алаяқтығы бойынша сотқа дейінгі тергеу басталды, ,деп хабарлайды Todayinfo агенттігі.
Қайырымдылық аукционы және қаржылық алаяқтық
Тергеу материалдарына сәйкес, П.Қайрат 2021 жылдың қараша айында Ақмола облысында «Батыр» қоғамдық бірлестігіне оңалту орталығын салу үшін қайырымдылық аукционын ұйымдастырған. Ол іс-шараға мүгедек балалар мен олардың ата-аналарын тартып, жұрттың сеніміне кірген.
Агенттіктің мәлімдеуінше, жалған деректер арқылы 48 миллион теңге жиналғаны хабарланғанымен, шын мәнінде 22 миллион теңге түскен. Бұл қаржы жеке мақсатта пайдаланылғаны анықталды.
Жер телімі мен ғимаратқа қатысты жалған ақпарат
Сонымен қатар, П.Қайрат «Батыр» қоғамдық бірлестігіне 30 миллион теңгеге жер телімі сатып алынғанын мәлімдеген. Алайда, тексеру нәтижесінде бұл жер телімін қоғамдық бірлестік 2019 жылы өз қаражатына сатып алғаны белгілі болды.
Оңалту орталығының құрылысы осы уақытқа дейін басталмаған, әрі орталыққа берілді делінген ғимарат мүлдем жоқ болып шықты.
Тергеу жалғасуда
Қазіргі уақытта сотқа дейінгі тергеу жалғасып жатыр. Тергеу мүддесіне байланысты қосымша ақпарат жарияланбайды.
