Президент Қасым-Жомарт Тоқаевтың АҚШ сапарынан кейін бір күннің ішінде бірқатар көмекшілері мен кеңесшілерін қызметінен босатуы қоғам назарын аударды. Әдетте мұндай кадрлық шешімдер кезең-кезеңімен жасалса, бұл жолы ауыс-түйістер ұжымдық сипатта, бір мезетте жүзеге асты. Бұл қадам президент әкімшілігінде жүйелі дағдарыстың барын аңғартатын сыңайлы. Қоғам белсендісі Әміржан Қосанов лауазымды тұлғалардың жиі ауысуы қалыпты үрдіске айналғанын айтады, деп хабарлайды Todayinfo.kz
Соңғы жылдары министрлерден бастап ауыл әкімдеріне дейін лауазымды тұлғалардың жиі ауысуы қалыпты үрдіске айналды. Кеше ғана тағайындалған шенеунік көп ұзамай қызметінен босап жатады. Бірақ олардың не үшін қызметтен кеткені туралы қоғамға ашық ақпарат берілмейді. Бұл дұрыс емес, өйткені әрбір шенеунік – салық төлеушілердің есебінен жалақы алатын мемлекеттік қызметкер. Демек, кез келген азамат оның қызметке не үшін келгенін, не себепті отставкаға кеткенін білуге құқылы.
Президент әкімшілігінің тағы бір осал тұсы – ақпараттық ашықтықтың жоқтығы. Президент қабылдаған шешімдерді түсіндіру кеңесшілер мен көмекшілердің міндеті болса да, олар көп жағдайда үнсіз қалады. Соның салдарынан сын көбіне президенттің жеке басына бағытталады. Егер әрбір салаға жауапты көмекшілер қоғам алдында шығып, өз саласына қатысты сұрақтарға жауап берсе, ел ішінде тарап жүрген түрлі әңгімелер мен күмән сейілер еді.
Президент дипломатиялық мектептен шыққандықтан, маңайына да дипломаттарды жинай бастады. Алайда мансаптық дипломат болу – кез келген салада нәтижелі басшы бола алады деген сөз емес. Әр саланың өз ерекшелігі бар. Соған қарамастан мемлекеттік қызметтің түрлі салаларына дипломаттардың келуі кәсібилікті әлсіретіп отыр.
Тағы бір ескі дәстүр сақталып қалған: қызметінен кеткен шенеунік көп ұзамай басқа бір «жылы орынға» жайғасады. Бұл үрдіс жас кадрлардың өсуіне кедергі келтіреді. Қоғамнан оқшауланбай, өз кәсібі бойынша еңбек етіп, жаңа буынға жол берудің орнына, шенеуніктер бір қызметтен екінші қызметке көшіп отырады. Жаңа Қазақстан талаптары мұндай тәжірибеден бас тартуды қажет етеді.
«Қорытындылай келе, соңғы кадрлық шешімдер президент әкімшілігінің ішкі жұмысына қоғам тарапынан сұрақ көп екенін тағы да дәлелдеді. Жаңа Қазақстан құру үшін ашықтық, кәсібилік және жауапкершілік қағидаттары толық орындалуы тиіс. Әйтпесе, «кадр тұрақсыздығы» ұғымы Жаңа Қазақстанның басты белгісіне айналып кетуі мүмкін», деп жазды ол Abai.kz сайтына жариялаған мақаласында.
