Бұл туралы Todayinfo.kz Ақордаға сілтеме жасап хабарлайды. Мемлекет басшысы Қорғаныс министрі Руслан Жақсылықовты қабылдап, ведомствоның 2024 жылғы жұмыс нәтижелері туралы есеп тыңдады.
Фото: Ақорда
Қорғаныс министрлігінің есебі
Кездесу барысында министр Руслан Жақсылықов әскердің жауынгерлік дайындығы, күзгі әскерге шақыру науқаны, әскери қызметтегі тәртіп пен қауіпсіздікті нығайту шаралары туралы баяндады. Сондай-ақ әскери қызметшілердің әлеуметтік мәртебесін арттыру және еңбекақыны көтеру бойынша қабылданған қадамдар туралы ақпарат берілді.
Министр әсіресе армияның жауынгерлік әлеуетін кезең-кезеңімен арттыру және әскерді дайындаудағы жаңа тәсілдерге ерекше назар аударылғанын атап өтті. Сонымен қатар, мемлекеттік қорғаныс тапсырысының орындалу барысы, әскерге жаңа техника мен қару-жарақтың, соның ішінде пилотсыз авиациялық жүйелер мен радиоэлектрондық күрес кешендерінің жеткізілуі туралы мәлімет берілді.
Президент Қасым-Жомарт Тоқаев Қазақстанның БҰҰ аясында Голан биіктіктерінде қызмет етіп жатқан бейбітшілік миссиясының маңыздылығын ерекше атап өтті.
Президенттің нақты тапсырмалары
Кездесу қорытындысы бойынша Мемлекет басшысы және Қарулы Күштердің Жоғарғы Бас қолбасшысы Қасым-Жомарт Тоқаев Қорғаныс министріне келесі бағыттар бойынша нақты тапсырмалар берді:
- отандық қорғаныс кәсіпорындарымен өзара әрекетті жандандыру;
- аумақтық қорғанысты дамыту;
- арнайы операциялар күштерін күшейту;
- әскери қызметтегі әлеуметтік және құқықтық жұмысты нығайту.
Украинадағы жағдайға байланысты жедел тапсырмалар
Еске сала кетейік, бұған дейін Қасым-Жомарт Тоқаев Украина төңірегіндегі ахуалдың ушығуына байланысты премьер-министрге, Президент Әкімшілігінің басшысына, күштік құрылымдар басшылары мен облыс әкімдеріне негізгі әскери және азаматтық нысандардың қауіпсіздігін қамтамасыз ету бойынша жедел шаралар қабылдауды тапсырған болатын.
21 қарашада өткен үкіметтің жедел отырысында Қорғаныс министрі Руслан Жақсылықов стратегиялық және инфрақұрылымдық нысандарды қорғау бойынша шаралар туралы баяндады. Премьер-министр барлық қызметтердің жұмысын күшейтіп, тұрақтылық, қоғамдық тәртіп, көлік және өмірлік маңызды нысандардың қауіпсіздігіне ерекше назар аудару қажеттігін тапсырды.
