Мемлекет басшысы Қасым-Жомарт Тоқаев Алматыдағы «Бағанашыл» балалар үйін Қонаев қаласына көшіру туралы шешіммен танысып, аталған мекеме тәрбиеленушілерінің құқықтарын қорғау мақсатында нақты тапсырмалар берді. Шулы оқиғаға қатысты қабылданған шешім жайлы оның хатшысы Руслан Желдібай жазды, деп хабарлайды Todayinfo.
«Бағанашыл» балалар үйінің тәрбиеленушілерін Алматыдан Қонаев қаласына көшіруге байланысты жағдаймен танысқан Қасым-Жомарт Тоқаев Алматы қаласының әкімі Дархан Сатыбалдыға оқушылардың оңтүстік астанада білім алуын жалғастыру үшін балалар үйіне жөндеу жұмыстарын жүргізуді және аталған нысанды қаланың балансына алуды тапсырды», — деп жазды Руслан Желдібай.
Мемлекет басшысының тапсырмасына сәйкес, балалар үйі басқа қалаға көшірілмейді. Бұл шешім ата-анасының қамқорлығынсыз қалған балалардың заңды құқықтары мен мүдделерін сақтауға бағытталған.
Президент Әкімшілігі аталған жағдайға байланысты қызметтік тексеріс жүргізетінін мәлімдеді.
Фото: Tengrinews.kz
