15 тамыз 2025 жылы Өңірдің абыз ақсақалы, ел ағасы, қоғам және мемлекет істеріне белсене араласқан қайраткер, Түркістан облыстық Ақсақалдар алқасының төрағасы, Түркістан облысының Құрметті азаматы, сондай-ақ Түркістан қаласы мен Сауран ауданының Құрметті азаматы, елге сыйлы ақсақал, ардақты азамат – Әзіретбергенұлы Жарылқасын дүниеден өтті, деп хабарлайды Todayinfo.kz.
Жарылқасын атамыз – бүкіл саналы ғұмырын ел игілігіне арнаған, ұлт болашағы үшін еңбек еткен ардақты тұлға. Оның өмір жолы – тұтас бір дәуірдің көрінісі, халқына қызмет етудің жарқын үлгісі.
Ол 1939 жылы 29 маусымда Оңтүстік Қазақстан облысы, қазіргі Түркістан облысы, Жайылма ауылында дүниеге келген. Балалық шағы сұрапыл соғыстан кейінгі ауыр жылдарға тап келсе де, білімге құштарлығы мен еңбекке адалдығы оны ерте танытты. 1946-1947 оқу жылында мектеп табалдырығын аттап, 1957 жылы Түркістан педагогикалық училищесін тәмамдайды.
Еңбек жолын қарапайым мұғалімдіктен бастап, өмірінің әр кезеңінде халыққа қызмет етудің биік үлгісін көрсетті. 1968-2001 жылдар аралығында Амангелді атындағы колхозда партия комитетінің хатшысы, кейін колхоз төрағасы қызметін абыроймен атқарды. Қай қызметте де әділдігімен, адалдығымен, іскерлігімен ел құрметіне бөленді.
2002-2008 жылдары Н.Оңдасынов атындағы мұражайдың директоры қызметінде өңір тарихының терең насихатталуына, ұлттық құндылықтардың сақталуына зор үлес қосты.
Ал 2001 жылдан 2018 жылға дейін Түркістан қалалық Ақсақалдар алқасының төрағасы қызметін атқарып, 2018 жылдан өмірінің соңына дейін Түркістан облыстық Ақсақалдар алқасын басқарды.
Кеңестік дәуір мен Тәуелсіз Қазақстан кезеңінде де мемлекет тарапынан еңбегі лайықты бағаланып, көптеген марапаттарға ие болды. Атап айтқанда, «Еңбек ерлігі үшін», «В.И. Лениннің 100 жылдығы» медалі, Тәуелсіздік кезеңіндегі «Барыс» және «Парасат» ордендерімен, «ҚР Тәуелсіздігіне 20 жыл», «Егемен Қазақстанның 10 жылдығы» және тағыда басқа бірнеше медальдары мен марапатталған. «Облысқа сіңірген еңбегі үшін» марапаты – осының дәлелі.
Жарылқасын атаның артында елге үлгі болған ұрпақтары, өнегелі ісі, ұлағатты сөзі мен парасатты болмысы қалды. Ол – ұстаз, басшы, ақылман, тұлға ретінде талай жасқа бағыт-бағдар берген, артында өшпейтін із қалдырған азамат.
Бүгінгі Түркістан – ардақты ағасының бейнесін ұмытпайды.
Ел мүддесін бәрінен биік қойған, әр сөзінде ұлт болашағы мен руханияты тұрған Жарылқасын Әзіретбергенұлы – халқымыздың жүрегінде мәңгі сақталады.
Барша туған-туыстарына, бала-шағасына, дос-жарандарына, әріптестеріне қайғыра көңіл айтамыз.
Түркістан қаласы әкімдігінің атынан!
