Президенттің туристік аймақтардың жағдайын сынға алуынан кейін өңір әкімдері инфрақұрылымға ерекше назар аудара бастады. Алматы облысының әкімі Марат Сұлтанғазиев Қайынды көліне апаратын жол мәселесі туралы айтып, нақты сомаларды атады, деп хабарлайды Todayinfo.
2,4 миллиард теңгеге жөнделетін жол
Әкімнің айтуынша, Қайынды көліне апаратын ұзындығы 12 шақырымдық жолдың күрделі жөндеу мәселесі бірнеше жылдан бері көтеріліп келеді. Бұл жолды жөндеуге арналған жобалық-сметалық құжаттар бұған дейін дайындалғанымен, бюджет тапшылығына байланысты жоба бірнеше рет кейінге шегерілген. Нәтижесінде құжаттар ескіріп, қазіргі талаптарға сәйкес келмей қалған.
2025 жылы жобалық-сметалық құжаттама қайта түзетіліп, құрылыс жұмыстарының жалпы құны 2,4 миллиард теңге көлемінде белгіленді. Оның ішінде 2025 жылға 1,5 миллиард теңге көлемінде қаржы қарастырылған.
«14 шілде күні конкурс жарияланды. Егер мердігер компания сәтті анықталса, құрылыс-монтаж жұмыстары тамыз айында басталады», – деді Марат Сұлтанғазиев.
Капшагай жағажайларындағы қауіпсіздік мәселесі де назарда
Сонымен қатар әкім Капшагайдағы жағажайлардағы жағдай туралы да пікір білдірді. Жақында болған қайғылы оқиғадан кейін, яғни бір әйелдің суға кетуінен соң, аймақтағы жағажайлардың қауіпсіздігіне қатысты шаралар күшейтілген.
Әкімнің айтуынша, қазіргі уақытта көптеген жағажайлар жеке меншікке берілгенімен, оларда құтқарушылар, қажетті құрал-жабдықтар және қауіпсіздік талаптары сақталмаған.
«Оқиға болған жердегі жер телімі белгілі мерзімге жалға берілген. Қазіргі таңда оның заңдылығы тексеріліп жатыр. Нәтижесіне байланысты тиісті шаралар қабылданады. Капшагай су қоймасындағы жағалау аймақтарында қауіпсіздікті қамтамасыз ету – жүйелі түрде шешуді талап ететін мәселе», – деп атап өтті ол.
Алматы облысының Жер ресурстарын басқару басқармасына су қорғау аймағында орналасқан, жалпы көлемі 48 гектардан асатын 18 жер учаскесі бойынша материалдар жолданған. Нәтижесінде 31 гектарды қамтитын 12 учаске бойынша заңбұзушылықтарды жою туралы нұсқамалар беріліп, қосымша тексеріс жүргізілуде.
Қонаев қаласындағы жағажай инфрақұрылымы
Бүгінде Қонаев қаласының аумағында 140-тан астам демалыс орны мен 8 коммуналдық жағажай жұмыс істейді. Алайда, жерді жалға алған 43 кәсіпкер не жағдажайды реттеп,инвестиция салмай, не инвесторларға бермей, туристік аумақтың дамуына кедергі келтіріп келеді.
