Қоғам қайраткері, спорт және білім саласында ұзақ жылдар қызмет атқарған Амалбек Тшанов қазіргі қыз-келіншектердің киім кию мәдениетіне және ар-ұят мәселесіне байланысты өз ойын білдірді. Бұл туралы ол Qazaq.Airan YouTube арнасына берген сұхбатында айтты, деп хабарлайды Todayinfo.
«Ұлы сөздің ұяты жоқ дейді ғой. Біз қазақ болғаннан кейін, үйленгеннен соң қалыңдық міндетті түрде ар-абыройын сақтаған қыз болуы керек. Ол өз бойындағы тазалықты тек өзінің болашақ жарына ғана арнауы қажет. Осындай ұстаным – халқымыздың бірігуіне, адалдық пен тазалыққа, намысқа негізделген ұлттық құндылық», – деді қоғам қайраткері.
Амалбек Тшанов қазіргі жастар тәрбиесіне, әсіресе қыз балалардың өзін-өзі ұстау, киіну мәдениетіне алаңдаушылық білдірді.
«Қазір, өкінішке қарай, ер-азаматтардың бойында намысты ояту қиын болып кетті. Мен бұл сөзді ағалық ниетпен айтып отырмын. Жастар, әсіресе қыздар, ренжімейді деп ойлаймын. Бірақ шындықты айту керек. Қыздарымыз ұяттан айырылған заманға келдік.Қалай болса солай киіну, өзіне мән бермеу, көкірегін ашып жүру, аяғын, санын ашып жүру – осындай жағдайлар қалыпты нәрсеге айналып кетті», – деді ол.
