Қарағанды облысының сақшылары қырағылық танытты. Полицейлер ескірткімен айналысатын топтың жолын кесті, деп хабарлайды Todayinfo ақпараттық агенттігінің тілшісі.
1 маусымнан бастап елімізде «Қарасора-2025» жедел-алдын алу іс-шарасы бастау алды. Науқанның басты мақсаты — ел аумағында есірткі өсіру, өндіру және тарату әрекеттерінің жолын кесу.
Аталған шара аясында Қарағанды облысында жедел қауіпсіздік шаралары қолға алынды. Аймақтың негізгі автожолдарында мобильді блокбекеттер орнатылып, жол қозғалысына қатаң бақылау орнатылды. Күндіз-түні кезекшілік атқару үшін 150-ден астам полиция қызметкері, 30 қызметтік автокөлік және арнайы техника жұмылдырылды. Әрбір күдік тудырған көлік пен бағыт мұқият тексерілуде.
Операцияның алғашқы күнінде-ақ ірі нәтижеге қол жеткізілді. Осакаров ауданына қарасты Батпақ ауылында облыстық прокуратураның қолдауымен Есірткі қылмысына қарсы іс-қимыл басқармасының қызметкерлері жасырын есірткі зертханасын анықтап, жұмысын тоқтатты. Шахтинск қаласының 24 және 25 жастағы екі тұрғыны ұсталды. Тергеу деректеріне сәйкес, олар 3 миллион теңгеге жеке үй сатып алып, оны синтетикалық есірткі өндіретін заңсыз химиялық зертханаға айналдырған.
«Тінту барысында 121 канистр химиялық реагенттер, өндірістік жабдықтар, респираторлар, жеке қорғаныс құралдары, сондай-ақ есірткі жасауға арналған престер мен реакторлар тәркіленді. Жалпы салмағы шамамен 2 тонна болатын прекурсорлар алынды», — деді Қарағанды облыстық ПД бастығының бірінші орынбасары Әбіл Әбілдин.
Бұл — биылғы жылдың басынан бері тіркелген үшінші ірі оқиға.
«Ұсталған азаматтарға қатысты қылмыстық іс қозғалды. Қазіргі таңда олар уақытша ұстау изоляторына қамалды», — деп хабарлады Қарағанды облысы Полиция департаментінің баспасөз қызметі.
