Қарағанды облысының Нұра ауданында көктемгі егіс науқаны қызу жүріп жатыр. Биыл аудан аграршылары 342 мың гектар алқапқа дән сеуіп, былтырғы көрсеткіштен 18 мың гектарға артық егістік жерді игермек, деп хабарлайды Todayinfo ақпараттық агенттігі облыс әкімінің баспасөз қызметіне сілтеме жасай отырып.
Ауыл шаруашылығы саласын әртараптандыру аясында майлы және мал азығына арналған дақылдардың үлесі артып келеді. Сонымен қатар, Нұра ауданында суармалы егіншілікті дамытуға ерекше көңіл бөлініп отыр – бұл өнімділікті арттырудың негізгі тетігі болмақ.
Облыс әкімі Ермағанбет Бөлекпаевтың жұмыс сапары барысында ауданның ауыл шаруашылық әлеуеті мен инфрақұрылымдық мәселелері назарға алынды. Әкім бірқатар ірі және орта шаруашылықтарды аралап, аграршылардың көктемгі дала жұмыстарына дайындығымен танысты.
Мәселен, Кенжарық ауылдық округіндегі «Отқанжар» ЖШС — қазақтың құйрықты қой тұқымын өсіріп отырған мал шаруашылығына маманданған серіктестік. Ал «Байтуған» қожалығы ауыл тұрғындарын жемшөппен қамтамасыз ету мақсатында жұмыс істеуде.
Кездесулер барысында әкім мемлекеттік қолдау, субсидиялар, жеңілдетілген несие беру тетіктері және жас фермерлерге көрсетілетін көмек жайында пікір алмасты. Сонымен қатар, өңірде асыл тұқымды мал көрмесі де ұйымдастырылды. Бұл фермерлер арасында тәжірибе алмасуға, жаңа тұқымдарды таныстыруға мүмкіндік берді.
«Бүгін біз Нұра ауданындағы көктемгі егіс науқанымен танысып, фермерлердің жоспарларын талқыладық. Егістік көлемі 18 мың гектарға ұлғайтылған. Суармалы жерлерді көбейту көзделіп отыр. Жас фермерлермен де сөйлестік, олардың келешегінен үміт зор. Оларды қолдауға дайынбыз», — деді Ермағанбет Бөлекпаев.
Аграрлық мәселелермен қатар, әкім өңірдегі өзекті инфрақұрылымдық проблемаларды да назардан тыс қалдырмады. Атап айтқанда, жергілікті тұрғындар көп жылдан бері көтеріп жүрген Жараспай – Нұра бағытындағы жолды жөндеу мәселесі күн тәртібінде тұр. Биыл бұл бағыттағы Жараспай – Құланөтпес учаскесінде құрылыс жұмыстары басталмақ. Қазір жобалық-сметалық құжаттама сараптамадан өтіп жатыр.
Сапар барысында облыс әкімі республикалық маңызы бар Астана – Қабанбай батыр – Нұра – Теміртау автожолының Көбетей ауылына қарайтын бөлігін де аралап көрді. «ҚазАвтоЖол» компаниясының өкілдері жол жөндеу жұмыстарының барысы туралы баяндама жасады. Жақын күндері ресайклинг әдісімен жолдың негізі жаңартылып, кейін асфальттау басталады. Жоба биыл толық аяқталады деп жоспарланған.
«Жол сапасын қамтамасыз ету – басты міндет. Ол үшін әр кезеңді қатаң бақылап, уақытылы орындалуын қамтамасыз ету қажет»,- деді облыс басшысы.
