Қарағанды облысында жыл басынан бері 2 трлн теңгеден астам сомаға өнеркәсіптік өнім өндірілді. Бұл туралы облыс әкімі Ермағанбет Бөлекпаев Өңірлік коммуникациялар қызметінде өткен брифингте мәлімдеді, деп хабарлайды Todayinfo ақпараттық агенттігі.
Әкімнің айтуынша, өңдеу өнеркәсібі секторы тұрақты өсім көрсетіп отыр. Экономиканы әртараптандыру және инвестициялар тарту жұмыстары жалғасуда.
– Негізгі капиталға салынған инвестициялар көлемі 327 млрд теңгеге дейін ұлғайды. Жыл соңына дейін бұл көрсеткіштің айтарлықтай артуы күтілуде. Жалпы, 2031 жылға дейін жалпы құны 4,3 трлн теңгені құрайтын 108 инвестициялық жобаны іске асыру жоспарланған. Бұл жобалар шамамен 11 мың жаңа жұмыс орнын құруға мүмкіндік береді, – деді Ермағанбет Бөлекпаев.
Облыс аумағында бірқатар жаңа өндіріс орындары іске қосылады. Атап айтқанда, металл бұйымдарын ыстық мырыштау, болат тік тігісті құбырлар мен алюминий радиаторлар шығару жобалары қолға алынған. Ірі инвестициялық жобалар қатарында Осакаров ауданындағы жел электр станциясының құрылысы және «Сарыарқа» арнайы экономикалық аймағында ферросилиций өндіретін өндірістік кешен бар.
Өңір басшысы шағын және орта бизнестің дамуы жайлы да айтты. Қазіргі таңда бұл секторда 100 мыңға жуық кәсіпкерлік субъектісі тіркеліп, 245 мыңнан астам адам жұмыспен қамтылған.
– Жыл соңына қарай шағын және орта бизнестің жалпы өңірлік өнімдегі үлесі 23 пайызға жетеді деп болжануда. Бизнес бастамаларды қолдау мақсатында мемлекет тарапынан субсидиялар, кепілдіктер, гранттар және шағын несиелер ұсынылуда, – деді облыс әкімі.
Қарағанды облысы инвестициялық белсенділік, өнеркәсіптік қуат пен кәсіпкерлік әлеует тұрғысынан ел экономикасының маңызды тіректерінің бірі болып қала береді.
