Қожа Ахмет Ясауи атындағы Халықаралық қазақ-түрік университетінде өткен «Қазақ тілі – ғылым тілі: жасанды интеллект және терминология» атты II халықаралық симпозиум – ұлттық ғылымның, тіліміздің және технологияның тоғысында өткен тағылымы мол әрі тарихи жиын болды, деп хабарлайды Todayinfo.
Симпозиумның басты мақсаты – қазақ тілін ғылым тілі ретінде дамыту мәселесін талқылау, жасанды интеллект мүмкіндіктерін пайдалана отырып, қазақ терминологиясын жаңа белеске көтерудің тетіктерін қарастыру. Бұл орайда отандық және шетелдік белгілі ғалымдардың басын қосқан жиын қазақ тілінің ғылыми әлеуетіне деген зор сенімді тағы бір мәрте дәлелдеді.
Іс-шараға Түркістан облысының әкімі Нұралхан Көшеров пен ҚР Ғылым және жоғары білім министрлігінің өкілдері, соның ішінде Тіл саясаты комитетінің төрағасы Ербол Тілешов арнайы қатысып, құттықтау сөз сөйледі. Сонымен қатар, пленарлық отырыста Оксфорд университетінен бастап, Қырғызстан, Өзбекстан сынды бауырлас елдердің жетекші тілтанушы-ғалымдары қазақ тілінің ғылымдағы рөліне қатысты пайымды пікірлерін ортаға салды.
Симпозиум аясында өткен секциялық отырыстар мен ғылыми семинарлар – тілімізді ғылымның барлық саласына енгізудің әдіснамалық негіздерін қалыптастыруға бағытталды. Жасанды интеллект пен академиялық қазақ тілінің байланысын нығайту, ғылыми коммуникацияны жетілдіру – алдағы жылдарда жүзеге асуы тиіс стратегиялық мақсаттар қатарында.
Сонымен қатар симпозиумның мәдени бағыты да назардан тыс қалмады. «Ахмет Ясауи университеті – Жаһандық жас ғалымдар» фотокөрмесі, түркі халықтарының зияткерлік ойындары мен қазақ тіліне аударылған 10 оқулықтың тұсаукесері – тіл мен мәдениеттің сабақтастығын паш еткен маңызды шаралар болды.
Сөз жоқ, бұл симпозиум – қазақ тілінің ғылым тілі ретіндегі болашағына жасалған сенімді қадам. Қазақ тілінің заманауи ғылыммен, цифрлық технологиялармен үндесе алатынын дәлелдейтін мұндай жиындар – ұлттық рух пен ғылыми дамудың алтын арқауы. Тіліміз – ғылым тіліне айналатын кезеңге қадам басты. Ендігі міндет – осы бағыттағы жұмыстарды жүйелеу, қолдау және алға жылжыту.
«7M02205 – Исламтану» білім бағдарламасы, 1 курс магистрант Жамал Р.А.
Ғылыми жетекші: филос.ғ.д., проф. Бегалинова К.К.
https://farabi.university/
