Қарағанды облысында Қазақстандағы жаңартылатын энергия көздерін дамыту бағдарламасы аясында GCF (Жасыл климат қоры) мен Еуропалық қайта құру және даму банкі (ЕҚДБ) қаржыландырған ірі жобалар таныстырылды. Делегация құрамындағы GCF атқарушы директоры Мафальда Дуарте, ҚР Экология және табиғи ресурстар министрі Ерлан Нысанбаев, Қарағанды облысының әкімі Ермағанбет Бөлекпаев және ЕҚДБ өкілдері Сарандағы 100 МВт қуатты күн электр станциясының жұмысымен танысты, деп хабарлайды Todayinfo ақпараттық агенттігі.
160 гектар аумақта орналасқан күн электр станциясы 2019 жылдан бері табысты жұмыс істеп келеді. Онда 300 мыңнан астам фотоэлектрлік модуль орнатылған. Нысанның негізгі қосалқы станциясы мен энергия жинақтау кешені жергілікті тұрғындардан құралған 11 қызметкерден тұратын ұжыммен басқарылады.
Кәсіпорын басшысы Евгений Гребенниковтың айтуынша, станцияның орташа жылдық электр энергия өндірісі – 120 миллион киловатт-сағат. Өндірілген энергия ЖЭК-ті қолдау жөніндегі қаржы-есеп айырысу орталығымен жасалған келісімшарт бойынша KEGOC желісіне толық көлемде жеткізіледі.
– Мемлекет жасыл экономика туралы заң арқылы жобаның іске асырылуына маңызды қолдау көрсетті. Жергілікті атқарушы органдармен ашық терезе қағидаты бойынша жұмыс істеп, жер учаскелерін бөлу, техникалық-экономикалық негіздеме дайындау, қажетті материалдар алу кезінде көмек алдық, – деді Евгений Гребенников.
GCF басшысы Мафальда Дуарте өз сөзінде станцияның халықаралық инвестициялар үшін маңыздылығын атап өтті:
– Бұл станция Қазақстандағы ЖЭК дамыту бағдарламасының басты жобаларының бірі. Бағдарламаның барлық қаржылық көлемінің 40%-ы осы жобаға тиесілі. Біз станцияның табысты жұмыс істеп жатқанын көріп, Қазақстан үкіметімен болашақ жобалар бойынша басымдықтарды талқылауға дайынбыз, – деді ол.
Делегация сондай-ақ Ә. Сағынов атындағы Қарағанды техникалық университетіне барып, ЖЭК саласында ғылыми зерттеулер мен білім беруді дамыту перспективаларын талқылады.
Саран күн электр станциясы таза технологияларды енгізу мен тұрақты энергетика саласында халықаралық инвестицияларды тартудың табысты үлгісіне айналды. Нысан жыл сайын көмірқышқыл газы (CO2) шығарындыларын айтарлықтай төмендетіп, экологиялық тұрақтылықты қамтамасыз етуде маңызды рөл атқарады.
GCF мен ЕҚДБ арасындағы серіктестік Қазақстанның жасыл энергетика саласындағы әлеуетін арттыруға және жаһандық климаттық өзгерістермен күреске елеулі үлес қосуға мүмкіндік береді.
