12 жылда салынады
Атом энергетикасы агенттігінің мәліметінше, Қазақстандағы алғашқы атом электр станциясының құрылысы шамамен 12 жылға созылады. Яғни, 2035–2036 жылдары аяқталады деп жоспарланып отыр.
«Әлемдік тәжірибеде АЭС жобалау, салу және іске қосу мерзімі 10–12 жылды құрайды. “Росатом” бұл жоспарлармен келісіп отыр», – деп хабарлады ведомство.
АЭС қайда салынады?
2025 жылдың ақпанында Үкімет АЭС салынатын нақты орынды бекітті — Алматы облысы, Жамбыл ауданы, Үлкен ауылы. Бұған дейін бұл елдімекен басты үміткерлердің бірі ретінде аталып келген.
“Росатом” – бас мердігер
Қазақстандағы алғашқы АЭС-ті салатын халықаралық консорциумның жетекшісі ретінде “Росатом” таңдалды. Ресей тарапы құрылыс үшін экспорттық кредит ұсынбақ.
Екінші АЭС те жоспарда
Президент Қасым-Жомарт Тоқаев Үкімет пен Парламентке екінші АЭС салынатын орынды анықтауға қатысты ұсыныстар дайындауды тапсырған. Энергетика министрі Алмасадам Сәтқалиевтің айтуынша, екінші станцияны біріншімен қатар салу мүмкіндігі де қарастырылып жатыр.
Неліктен АЭС қажет?
АЭС Қазақстанның энергетикалық қауіпсіздігін қамтамасыз етіп, жасыл экономикаға көшуді жеделдетуге бағытталған. Мемлекет қауіпсіз, заманауи технологияларды таңдауға ерекше мән беріп отыр.
