Алматы облысының әкімі Марат Сұлтанғазиев өңірде атқарылып жатқан өндірістік жобалар жайлы айтып берді, деп хабарлайды Todayinfo ақпараттық агенттігі.
Оның айтуынша, елде өндірілетін сусынның 60 пайызы Алматы облысына тиесілі. Өзге де салалар бойынша көрсеткіштер ел бойынша алдыңғы қатарда тұр.
«Қазіргі күні ішкі өнімде құрылыс материалдарын шығару қарқынды дамып келе жатыр. Логистиканың дамуы да жолға қойылған. Ал оған серпін берген мынау тоғыз жолдың торабындағы екі темір жолы бар. Қытайдан келе жатқан автожолдар біз арқылы өтеді. Логистика жақсы дамып келе жатыр. Ауыл шаруашылық өнімін өңдеу де жүйелі жолға қойылды», — дейді аймақ басшысы.
Марат Сұлтанғазиевтің айтуынша, сусын өндірісі бойынша Алматы облысы көш бастап тұр.
«Елде өндірілетін сусынның 60 пайызы Алматы облысында шығарылады. Жұмыртқа, тауық етін өндіруден де алғашқы орындарда тұрмыз. Мысал келтірсек, жақында өрік фестивалін өткіздік. Біріншіден, оны туризм үшін, турист тарту үшін ұйымдастырдық. Екінші жағынан бұл да бір дара сала. Кейін ауқымы кеңейе түседі. Оның үстіне Ұйғыр ауданында өсетін өрік саны Өзбекстаннан көп. Кәдімгі сүйекті өрік өседі. Сол сияқты өзімізге тән артықшылықтар бар», — дейді облыс әкімі.
Сондай-ақ, әкім Алматы облысында қазақтың ұлттық болмысын тағыда бір бекітіп, рухани байлығын айқындап, салт-дәстүрін сабақтауға арналған «Қымызмұрындық» фестивалі өткені туралы да айтты.
