Қазақстанда өндірістік жарақаттану деңгейі жоғары. 2024 жылы 1500-ден астам жазатайым оқиға тіркеліп, 1408 адам зардап шеккен, оның ішінде 202 адам қаза тапты. Бұл туралы ҚазАқпаратқа Мемлекеттік инспекция комитеті мәлімдеді.
Өндірістік жарақаттану деңгейі жоғары өңірлер:
- Қарағанды облысы – 159 адам зардап шеккен;
- Шығыс Қазақстан облысы – 124 адам;
- Алматы қаласы – 116 адам;
- Павлодар облысы – 112 адам;
- Абай облысы – 101 адам;
- Қостанай облысы – 91 адам.
Министрлік мәліметтері бойынша, өндірістік жарақаттану 2023 жылмен салыстырғанда 4,5%-ға азайған. 1000 жұмысшыға шаққандағы жазатайым оқиғалар коэффициенті 0,20-ны құрайды.
Негізгі себептер:
- Жұмыс берушілердің өндірісті дұрыс ұйымдастырмауы;
- Жұмысшылардың сақтық шараларын елемеуі;
- Жол қозғалысы ережелерін бұзу;
- Еңбекті қорғау және қауіпсіздік ережелерінің сақталмауы.
Соңғы оқиғалар:
Жақында Қазақстанның үш аймағында өндірістік жазатайым оқиғалар тіркелді:
- Жезқазғанда мұнай базасында жарылыс болып, төрт адам зардап шекті.
- Алматы облысында зауыт жұмысшысы қаза тапты.
- Шахталарда болған апаттар: «Қазақмыс» және ERG шахталарында жұмысшылардың өлімі тіркелді.
Маңғыстау облысындағы жағдай
Министрліктің ресми статистикасына Маңғыстау облысы енбеген. Бұл аймақта өндірістік жарақаттардың жасырылуы мүмкін екені айтылуда. 2024 жылдың желтоқсанында қытайлық мұнай компаниясының жұмысшылары әріптесінің қазасынан кейін еңбек жағдайларын жақсартуды талап етіп, ереуіл ұйымдастырған болатын.
