Қазақстанда атом электр стансаларын (АЭС) салу жобасы аясында реактор жеткізушілерін (вендорларды) айқындау мақсатында ашық және бәсекелі диалог әдісі қолданылды. Бұл тәсіл шеңберінде әлемдік жетекші компаниялармен келіссөздер жүргізіліп, олардың өндірістік нысандарына сапарлар ұйымдастырылды,деп хабарлайды Todayinfo.
Атқарылған жұмыстар нәтижесінде ықтимал вендорлардың қысқартылған тізіміне келесі компаниялар кірді:
«Росатом» – Ресей Федерациясы;
China National Nuclear Corporation (CNNC) – Қытай;
Électricité de France (EDF) – Франция;
Korea Hydro & Nuclear Power (KHNP) – Оңтүстік Корея.
Бұл компаниялардың технологиялары мен ұсыныстары Қазақстанның Атом энергиясы жөніндегі агенттігі мен «Қазақстандық атом электр станциялары» ЖШС және француздық Assystem инжинирингтік компаниясы әзірлеген әдістеме бойынша кешенді түрде бағаланды.
Реакторлық технологиялар келесі негізгі критерийлер бойынша талданды:
қауіпсіздік деңгейі;
технологиялық және қаржылық тиімділік;
халықаралық тәжірибе;
кадрларды даярлау әлеуеті;
жергілікті қамту үлесі;
басқа да маңызды факторлар.
Ведомствоаралық алаңдарда жүргізілген талдау нәтижесінде, «Росатом» Қазақстандағы бірінші АЭС жобасы бойынша халықаралық консорциумның жетекшісі ретінде танылды. Екінші орында – Қытайдың CNNC компаниясы, үшінші және төртінші орындарға EDF пен KHNP жайғасты.
Қазақстанда жоспарланып отырған екінші АЭС жобасы бойынша CNNC негізгі серіктес ретінде қарастырылып отыр. Қазіргі таңда осы бағытта мемлекеттік органдар мен вендор-компаниялар арасында келіссөздер жүргізілуде.
Сонымен қатар, үшінші АЭС құрылысы бойынша да CNNC компаниясымен және өзге де әлеуетті жеткізушілермен шағын және орта қуатты реакторлар бойынша диалог жүріп жатыр.
2024 жылғы 30 желтоқсанда ҚР Үкіметінің №1137 қаулысымен Алматы облысының Жамбыл ауданы бірінші АЭС-ті салуға арналған аумақ ретінде бекітілді. Қазір сол ауданда инженерлік-іздестіру жұмыстары бастауға дайындық жүргізілуде.
Сонымен қатар, екінші АЭС үшін басқа өңірлер де қарастырылып жатыр. Мүмкін болатын алаңдарға бағалау жүргізіліп, қорытынды шешім энергетикалық теңгерім мен инфрақұрылымның дайындығына байланысты қабылданатын болады.
