Фото: istockphoto.com
Қазақстан Республикасының Ішкі істер министрлігі сотталған әйелдерге рақымшылық жасау мүмкіндігін қарастырып жатқанын мәлімдеді. Осыған дейін Мәжіліс депутаты Қарақат Әбден депутаттық сауал жолдаған еді, деп хабарлайды Тodayinfo ақпараттық порталы.
Ведомство бұл гуманизм қағидаттарына сай келетінін, сондай-ақ мемлекеттік бюджетті үнемдеуге және түзеу мекемелеріндегі жүктемені азайтуға ықпал ететінін атап өтті.
Қазіргі таңда 6399 әйел қылмыстық құқық бұзушылық үшін жазасын өтеп жатыр:
- 2692 әйел бас бостандығынан айыру орындарында,
- 3707 әйел пробациялық бақылауда.
ҚР Қылмыстық кодексінің 78-бабына сәйкес, ауырлығы аз және орташа қылмыс жасаған 1220 әйел жазадан босатылуы мүмкін. Сонымен қатар, зорлық-зомбылыққа қатысы жоқ 2002 әйел сотталған, олардың 1766-сы алғаш рет жауапқа тартылған.
Ал ауыр және аса ауыр қылмыс жасаған 5055 әйел үшін жаза мерзімін қысқарту мүмкіндігі қарастырылады.
Рақымшылық беру кезінде сотталғандардың әлеуметтік жағдайына ерекше назар аудару ұсынылады. Атап айтқанда:
- 29 мүгедек әйел (I топ – 3, II топ – 3, III топ – 15),
- 60 жастан асқан 243 әйел,
- 13 жүкті әйел,
- 3 жасқа дейінгі балалары бар 58 әйел,
- 226 көпбалалы ана рақымшылыққа ілігуі мүмкін.
Сондай-ақ, 3910 сотталушыға бас бостандығынан айыру жазасын жеңілдетілген жаза түріне ауыстыру ұсынылып отыр.
Рақымшылықтың ықтимал салдары
Министрлік рақымшылықтың оң әсерлерін атап өтті, оның ішінде:
✅ Мемлекеттік бюджетті жылына 2,1 млрд теңгеге дейін үнемдеу (бір сотталғанға шығын – күніне 2900 теңге).
✅ Әйелдердің қоғамға қайта бейімделуіне мүмкіндік беру.
✅ Отбасылық құндылықтарды нығайту және балалардың құқықтарын сақтау.
✅ ҚАЖ мекемелеріндегі жүктемені азайту және сотталғандарды ұстау жағдайларын жақсарту.
Алайда, жәбірленушілердің құқықтарын қорғау, сондай-ақ рақымшылық алғандар арасында қайталанған қылмыстардың орын алу қаупі де назарға алынатын болады.
Қазіргі уақытта бұл ұсыныс қосымша талқылауды талап етеді.
