Алматыда орналасқан De Montfort University Kazakhstan (DMUK) — Қазақстандағы алғашқы халықаралық британдық университет қыркүйекте алғашқы бітіруші түлектерін салтанатты түрде марапаттамақ, деп хабарлайды Todayinfo ақпараттық агенттігі.
De Montfort University Kazakhstan (DMUK) — Қазақстандағы алғашқы халықаралық британдық университет. Оқу орны Алматыда орналасқан, 2021 жылдан бастап жұмыс істейді.
Ұлыбританиядағы мемлекеттік университет De Montfort University Leicester-дің филиалы ретінде ашылған білім ордасында 30 000-нан астам студент оқиды, 3 000-ға жуық қызметкер жұмыс істейді. Оның ішінде 20 елден келген халықаралық профессорлар мен мамандар бар.
Университет жаһандық көзқарасты ұстанады, оның Дубай, Қазақстан, Камбоджа және Лондон қалаларында кампустары бар, сондай-ақ түрлі елдерде халықаралық академиялық серіктестіктер құрған.
Қазақстандағы алғашқы британдық кампус ретінде DMUK “Бизнес”, “Ақпараттық технологиялар” және “Дизайн” бағыттары бойынша білім береді. Барлық бағдарламалар ағылшын тілінде оқытылады.
Студенттер DMU Leicester университетінің кітапханасына және Алматыдағы кампус арқылы барлық оқу материалдарына қол жеткізе алады.
Қазіргі таңда университетте шамамен 1 000 студент оқып жатыр. Алғашқы түлектер тобы қазақстандық беделді компанияларға жұмысқа орналасып үлгерді.
DMUK студенттері Ұлыбритания дипломын Қазақстанда отырып-ақ ала алады, алайда қалаған жағдайда Лестер, Лондон немесе Дубайдағы кампустарда оқуды жалғастырып, соңғы курсты шетелде аяқтауға мүмкіндігі бар. Әдетте, студенттер Қазақстанда үш жыл оқып, соңғы жылын Ұлыбританияда өткізеді. Жақында соңғы 25 студент Лестер кампусында оқуын аяқтап, олардың кейбіреулері Ұлыбританияда жұмысқа тұрды.
DMUK студенттерінің дүниетанымын кеңейту мақсатында түрлі іскерлік, мәдени және технологиялық орталықтарға халықаралық сапарлар ұйымдастырып келеді. Бүгінге дейін университет студенттеріне арнап сегіз халықаралық сапар өткізді. Бұл сапарлар Осака (Жапония), Сеул (Оңтүстік Корея), Берлин (Германия), Лестер мен Лондон (Ұлыбритания), сондай-ақ Куала-Лумпур (Малайзия) қалаларында өтті.
DMUK үшін басты басымдық – студенттердің жұмысқа орналасуы. Университетте халықаралық тәжірибесі бар кәсіби мансап кеңесшілер тобы жұмыс істейді. Олар студенттерге тағылымдамадан өтуге және жұмыс істеуге көмектеседі.
