31 қаңтар күні Ұлттық банк балаларға арналған «Ұлттық қор – балаларға» бағдарламасы аясында 2025 жылғы екінші мақсатты талаптарды есептеді.
Бағдарлама аясында әр балаға 129,38 доллардан бөлініп, жалпы аударым көлемі 888,8 миллион долларды құрады. 2024 жылдың соңындағы мәліметтер бойынша, бағдарламаның 6 921 035 қатысушысы бар.
Алғаш рет балаларға арналған мақсатты талаптар 2024 жылы беріліп, ол кезде әр балаға 100,52 доллардан тиесілі болған. Осылайша, екі жыл ішінде бір балаға жинақталған жалпы сома 232,94 долларды құрап отыр.
Ұлттық банк не дейді?
«Ұлттық банк» өкілдерінің мәліметінше, жыл сайын аударылатын қаражат көлемі Ұлттық қордың валюта активтері мен оның ұзақмерзімді инвестициялық табысына тікелей байланысты. «Ұлттық қор– балаларға» бағдарламасы шеңберінде Ұлттық қордың жыл сайынғы ұзақмерзімді инвестициялық табысының 50 пайызы арнайы шоттарға аударылады.
«Маңыздысы – әр балаға бұрынғы жылдары жиналған қаражат 18 жасқа толғанға дейін инвестициялануын жалғастырып, қосымша табыс әкеледі«, – деп хабарлады Ұлттық банк өкілдері.
Ақпаратты қайдан көруге болады?
Бағдарлама шеңберінде әр балаға тиесілі соманың жаңартылған деректері 31 қаңтардан бастап қолжетімді болады деп жоспарланған. Бұл ақпаратты:
- eGov mobile (электрондық үкіметтің мобильдік қосымшасы),
- kids.enpf.kz сайтынан көруге болады.
Қазіргі таңда «Ұлттық қор – балаларға» бағдарламасы бойынша ақпарат кейбір жеке кабинеттерде әлі жаңартылмағаны айтылып отыр. Алайда 31 қаңтарда толық деректер жарияланғанда, ата-аналар мен балаларға бағдарлама бойынша қанша қаражат жиналғанын онлайн режимде тексеруге мүмкіндік беріледі.
Бағдарлама туралы қысқаша
«Ұлттық қор – балаларға» бағдарламасы 2024 жылдан бастап іске қосылды. Жобаға сәйкес, Қазақстан Республикасының кәмелетке толмаған азаматтарына (18 жасқа дейін) жыл сайын Ұлттық қордың ұзақмерзімді инвестициялық табысының жартысы аударылады. Жинақталған қаражат бала 18-ге толғаннан кейін ғана пайдалануға беріледі, яғни оны мерзімінен бұрын шешіп алу мүмкін емес.
Мамандардың айтуынша, бұл бастама еліміздің болашақ азаматтарына қаржылық қолдау көрсетуге бағытталған және жинақтар көлемі Ұлттық қордың инвестициялық кірістілігіне тәуелді түрде жыл сайын өзгеріп отырады.
