Су ресурстары және ирригация министрлігі 100-ден астам қазақстандық маманның Қытайда тәжірибе алмасатынын мәлімдеді, деп хабарлайды Тodayinfo ақпараттық порталы.
Министрлік биылғы жылы мыңға жуық су шаруашылығы маманын қайта даярлау және біліктілігін арттыруды көздеп отыр. Бұл мақсатта халықаралық әріптестік аясында қазақстандық мамандар Қытайдың Power China компаниясымен бірлескен оқу бағдарламаларына қатысады.
Мамандарды даярлау кезеңдері
Алғашқы топ сәуір айында Қытайға аттанады. Жоспар бойынша 30 маманнан тұратын алғашқы топ сапарын бастайды, кейін әр тоқсан сайын 25 маманнан құралған бірнеше топ кезектесе жіберіледі. Жалпы алғанда, осы бағдарлама аясында 105 қазақстандық маман Қытайда кәсіби біліктілігін арттырады.
Ұлттық университет және кадр даярлау
Су ресурстары саласындағы кадрларды даярлау – елдегі су шаруашылығын жаңғырту бағдарламасының басты бағыттарының бірі. Мемлекет басшысының тапсырмасымен Тараз қаласында Ұлттық су шаруашылығы және ирригация университеті ашылды, онда қазіргі уақытта 200-ге жуық студент білім алып жатыр.
Сонымен қатар, министрлік Салалық кәсіби біліктілік жөніндегі кеңес құрды. Бұл кеңес су саласы мамандарына арналған кәсіби стандарттарды әзірлейді. Осы стандарттарға сүйене отырып, қазақстандық жоғары оқу орындары білім беру бағдарламаларын жетілдірмек.
« Біздің министрлік кәсіби стандарттарды әзірлеуді қолға алып, оқу орындарының білім беру бағдарламаларын осы стандарттарға сәйкес жаңартуды жоспарлап отыр», — деді ҚР Су ресурстары және ирригация министрлігі Ғылым және инновация департаменті Су шаруашылығындағы адам ресурстарын дамыту басқармасының басшысы Дидар Жәнібекұлы.
