Фото: Kyzylorda-news.kz
Қазақстанның қазіргі сыртқы саясаты тікелей Мемлекет басшысы Қасым-Жомарт Тоқаевтың бастамалары мен көзқарасына негізделген. 2020 жылдың 6 наурызында Президент 2020–2030 жылдарға арналған Қазақстан Республикасының сыртқы саяси даму тұжырымдамасын бекітті. Бұл құжат елдің сыртқы саясаттағы сабақтастығын сақтай отырып, көпвекторлы және теңгерімді бағытты нығайтуды көздейді, деп хабарлайды Todayinfo.kz ақпарат агенттігі.
Көпвекторлы саясат — Қазақстанның геосаяси жағдайынан туындайтын объективті қажеттілік. Еуразия құрлығының дәл жүрегінде орналасқан ел үшін көршілес мемлекеттермен тату қатынас орнату, әлемдік державалармен тең әріптестік орнату — ұлттық қауіпсіздік пен тұрақтылықтың кепілі.
Жаңа тұжырымдама қазіргі әлемнің күрделі динамикасына бейімделіп, жаһандық өзгерістер мен өңірлік қауіптерге дер кезінде жауап беруді көздейді. Себебі халықаралық ахуал үнемі өзгеріп отырады, ал Қазақстан оған икемді әрі уақтылы жауап беріп келеді.
Белгілі саясаттанушы Қайрат Айтбайұлы еліміздің көпвекторлы бағытының тиімділігін ерекше атап өтті:
«Қазақстан тәуелсіздік алған сәттен бастап көпвекторлы саясатты ұстанып келеді. Бұл – біздің географиялық жағдайымыз бен тарихымыздан туындайтын табиғи таңдау. Көршілермен тату болу – халқымыздың ежелгі ұстанымы. Осы саясаттың арқасында Қазақстан әлемдік аренада өз орнын айқын алды», – дейді ол.
Сарапшының пікірінше, Қасым-Жомарт Тоқаевтың сындарлы және прагматикалық саясаты елдің халықаралық беделін жаңа деңгейге көтерді:
«Президентіміздің бір жылдың ішінде бірнеше елмен ынтымақтастық орнатып, стратегиялық байланыстарды күшейтуі – соның айқын дәлелі. Біздің елге де көптеген мемлекеттердің басшылары келіп, ірі келісімдерге қол қойып жатыр. Мұның бәрі елге инвестиция тартуға және экономикалық өсімге жол ашуда», – деді саясаттанушы.
Ол сондай-ақ, Қазақстанның халықаралық мінберлердегі бастамаларына да назар аударды:
«Биыл БҰҰ мінберінде Қасым-Жомарт Тоқаев реформалар мен ғаламдық әділдік туралы батыл ұсыныстар айтты. Бұл ойлар кейін басқа елдерде де қолдау тапты. Ал елордада өткен Digital форумында Қазақстанға қомақты инвестициялар тартылып, жаңа келісімдер жасалды. Мұның бәрі еліміздің алдыңғы қатарлы, сенімді серіктес мемлекет екенін дәлелдейді», – деді Қайрат Айтбайұлы.
Қазақстанның көпвекторлы саясаты бүгінде елдің тұрақтылығы мен қауіпсіздігін қамтамасыз етіп қана қоймай, халықаралық аренадағы беделін де арттырып отыр. Бұл бағыт ел дамуының стратегиялық іргетасына айналғанын уақыттың өзі дәлелдеп келеді.
