Алматыда бұрынғы бас мүфти Сансызбай Құрбанұлының қызының ұзату тойы өтті, деп хабарлайды Todayinfo.kz ақпарат агенттігі ozgeris.info сайтына сілтеме жасап.
Салтанатты шараға 350-ге жуық ер адам шақырылған. Құрметті қонақтар арасында зиялы қауым өкілдері, дін қайраткерлері мен қоғам белсенділері болды. Ұйымдастырушылардың айтуынша, той толықтай шариғат талаптарына сай ұйымдастырылған.
Ақсақалдар жас жұбайларға бата беріп, ақ тілектерін арнады.
Алайда тойдың форматы әлеуметтік желіде қызу пікірталас тудырды. Кейбір қолданушылар қазақтың дәстүрлі қыз ұзатуында әйелдер мен ерлер бірге қатысатынын айтып, бұл жолғы шараны қазақы салтқа жат деп бағалады. «Қызды әдетте анасы, әпкелері, жеңгелері шығарып салады, бұл дәстүрді бұрмалау» деген пікірлер де жазылды.
Дегенмен, басқа бір бөлігі тойды шариғатқа сай өткізуді құптап, әр отбасының мерекені қалай ұйымдастыру керегін өзі шешуге құқылы екенін айтты.
Фото: ozgeris.info
