Мерейтой – бұл жай ғана күн емес, бұл кезекті атқарылған жұмыстарды қорытындылау, жаңа ұзақ мерзімді мақсаттарды белгілеудің негізі. Осы тұрғыда еліміздің отандық жоғары білім жүйесінде берік орын алған, елеулі табыстарға қол жеткізген әл-Фараби атындағы Қазақ ұлттық университетінің педагогика және білім беру менеджменті кафедрасының 85 жылдығына арналған «Заманауи білім мен ғылым: тарихы, болашағы» атты халықаралық ғылыми конференциясы дәлел бола алады, деп хабарлайды Todayinfo.
Ғылыми конференцияның ашылуы ҚР ғылым және жоғары білім министрі Саясат Нұрбектің құттықтау сөзімен ашылып, еліміздегі ЖОО-ның басшыларының құттықтауларымен жалғасты. Кафедра құрылғаннан бері орасан зор жұмыс тәжірибесі, жоғары дәрежелі оқытушылар құрамы, ғылыми зерттеулер, инновациялық әлеуеті – университетіміздің жоғары оқу орнының позициясын дамытуға, еңбек нарығында жоғары кәсіби сұранысқа ие мамандарды дайындауға, ғылыми жетістіктерді көбейтуге және дамудың жаңа әлемдік деңгейлеріне шығуға мүмкіндік берді.
Бүгінгі таңда жоғары оқу орындарының түлектерін кәсіби даярлау сапасы кәсіби білім мен дағдылардың жоғары деңгейімен ғана сипатталып қана қоймай, жаңа идеяларды, технологиялар мен шешімдерді шығару, ғылыми, практикалық қызмет және білім беру салаларында тиімді қарым-қатынас жасауды басты мақсат деп біледі. Кафедрамыздағы «7М01101 – Педагогика және психология», 7M01802 – Әлеуметтік педагогика және өзін-өзі тану», «7M01105 – Педагогика. Білім берудегі менеджмент» , «7М01103 – Инклюзивті білім беруді медициналық-педагогикалық сүйемелдеу» білім беру бағдарламаларын тәмәмдаған мамандар сұранысқа ие.
Кафедра оқытушылары университеттік білім берудің жоғары стандарттары негізінде үздік академиялық дәстүрлердің сақтаушысы болып табылады. Еліміздің түкпір-түкпірінен келген мектеп түлектері педагогика және білім беру менеджменті кафедрасының білім беру бағдарламасын таңдап, әл-Фараби атындағы Қазақ ұлттық университетінде білім алуды армандайды және көпшіліктің «Альма – матері» болып қала бермек!
