Белгілі қоғам белсендісі Айбар Олжай журналист Асхат Ниязовтың көпшілік алдында айтқан сөздерінде «ұлттық араздықты қоздыру» белгілері бар-жоғын тексеруді сұрап, ҚР Бас прокуратурасына ресми өтініш жолдады. Дауға журналистің «адамның жыныс мүшесіне тақия кигізу» туралы пікірі себеп болған.
Бұл туралы Айбар Олжай өзінің әлеуметтік желідегі парақшасында хабарлады. Оның айтуынша, Асхат Ниязовтың бұл сөздері қазақ қоғамында үлкен резонанс тудырып, көпшіліктің ашу-ызасына тиген.
«Асхат Ниязовтың адамның жыныс мүшесіне тақия кигізу туралы сөздері қазақ қоғамының ашуын туғызды. Онда ұлт араздығын қоздыру элементтері бар ма, жоқ па, соны анықтау үшін Бас прокуратураға Қылмыстық Кодекстің 174-бабы бойынша экспертиза жасауға өтініш түсірдім», — деп жазды белсенді.
Айбар Олжай бұл өтініш міндетті түрде қылмыстық іс қозғалады дегенді білдірмейтінін атап өтті. Енді құзырлы орган журналистің сөздеріне сараптама жасап, онда қылмыстық құрамның бар-жоғын анықтайтын болады.
«Мүмкін бұл жай әзіл шығар. Бірақ әзіл адамдарды жауластырмауы керек, керісінше, жақындастыруы тиіс. Асекеңнің (Асхат Ниязовтың) өз тілімен айтсақ, хороший юмор объединяет, а не хороший – разъединяет», — деп түйіндеді сөзін Айбар Олжай.
Ендігі кезекте Бас прокуратураның бұл мәселеге қатысты қандай шешім қабылдайтыны белгілі болады. Қазақстан Республикасының Қылмыстық кодексінің 174-бабында әлеуметтiк, ұлттық, рулық, нәсiлдiк, тектiк-топтық немесе дiни алауыздықты қоздырғаны үшін жауапкершілік қарастырылған.
