АҚШ-тың президенті Дональд Трамп Флорида штатында «Аллигатор Алькатрас» деп аталатын түрмені ашты, деп хабарлайды Todayinfo шетелдік басылымдарға сілтеме жасай отырып.
Бұл нысан Трамптың заңсыз миграцияға қарсы кампаниясы аясында салынған және мұнда шамамен 3000 адамды ұстау жоспарланып отыр.
Эверглейдс батпақты аймағында орналасқан орталықты аралау кезінде Трамп мұнда «әлемдегі ең қауіпті және қатыгез мигранттар» қамалатынын айтты. Оның сөзінше, маңайдағы аллигаторлар, крокодилдер мен питондар қашуға әрекеттенетіндерге тосқауыл болмақ.
Алайда орталық құрылысына бірқатар штат заң шығарушылары, жергілікті әкімшілік, экологтар мен тұрғындар қарсы шықты. Олар бұл аймақтың экожүйесіне қауіп төнуі мүмкін деп алаңдайды.
«Аллигатор Алькатрас» – заңсыз мигранттарды депортацияға дейін ұстап отыратын қатаң режимдегі жабық мекеме. Құқықтық мәртебесі бойынша бұл классикалық қылмыстық түрме емес, бірақ режимі мен жағдайы қатал, түрме тәртібімен жұмыс істейтін мекеме. Трамптың өзі де оны қылмыскерлерге арналған нысан ретінде сипаттаған.
Бұдан бөлек, тағы бір – 2000 адамға арналған осындай нысан Джексонвилл маңында салынады.
Фото: Getty Images
