Перизат Қайратқа қатысты сот отырысында бірнеше кәсіпорын өкілдері қайырымдылық қорына аударған қаржының жайын түсіндіруде. Айыпталушы басқаратын қорға ірі көлемде қаражат аударған заңды тұлғалар қазіргі уақытта сотта куәгер ретінде жауап беріп жатыр,деп хабарлайды Todayinfo.
«Стройконструкции» акционерлік қоғамының өкілі Галина Исаева сотта берген жауабында:
«2024 жылғы су тасқыны кезінде Перизат Қайрат басқаратын қорға 200 миллион теңге аудардық. Бұл шешімді қордың әлеуметтік желілердегі жағымды бейнесіне және жарнамалық видеоларына сеніп қабылдадық. Қормен тікелей байланыс болмады», – деді.
Куәгер қор туралы тек ашық дереккөздерден және әлеуметтік желілерден білгенін, ал Перизат Қайрат пен Ғайни Алашбаевамен жеке таныстығы жоқ екенін атап өтті.
Сотта Исаеваға қорға аударылған қаражаттың кейінгі тағдырына неге қызығушылық танытпағаны сұралғанда, ол:
«Біз есеп беруді күттік. Себебі қайырымдылық қорлары есеп беруге міндетті деп ойладық. 2025 жылдың наурызында есеп жарияланады деген ақпарат болған. Бірақ ештеңе көрмедік», – деп жауап берді.
Компания сотқа 200 млн теңгеге азаматтық талап арыз жолдап, қаражаттың толық қайтарылуын сұрап отыр.
Сотта жауап берген тағы бір куәгер – құрылыс компаниясының атқарушы директоры Олжас Алпысбаев. Ол 2024 жылдың 12 сәуірінде басшылықтың тапсырмасымен қорға 1 миллион теңге аударғанын айтты.
«Қор туралы әлеуметтік желіден білдім. Компания басшысы көмек көрсету керек деді. Мен сол бойынша қорға қаражат аудардым», – деді Алпысбаев.
