Ақмола облысының Степногорск қаласында жаңа дене шынықтыру-сауықтыру кешенінің іргетасын қалау салтанатты рәсімі өтті, деп хабарлайды Todayinfo ақпараттық агенттігі.
Жаңа орталықты “Алтыналмас” алтын өндіру компаниясы акционерлер тобының бастамасымен және директорлар кеңесінің төрағасы Владимир Жұманбаевтың қолдауымен қаржыландырып отыр. Жоба Ақмола облысы әкімдігімен бірлесіп жүзеге асырылуда.
Болашақ кешен барлық санаттағы тұрғындарға қолжетімді заманауи спорт орталығы болмақ. Кешенде 40 заманауи құрылғымен жабдықталған жаттығу залы, 30 адамға арналған бассейн, оның ішінде қозғалысы шектеулі жандарға арналған алты арнайы орын, 320 көрерменге лайықталған трибуналары бар баскетбол және волейболға арналған әмбебап ойын залы, бокс, күрес, гимнастика және үстел теннисіне арналған мамандандырылған залдар секілді нысандар болады.
Нысанның жалпы аумағы шамамен 6 мың шаршы метрді құрайды. Кешеннің айналасында кең автотұрақтар, жасыл аймақтар, орындықтар мен спорт алаңдары салынады. Жобаны 2026 жылы аяқтау жоспарланып отыр.
“Көпфункциялы дене шынықтыру-сауықтыру кешені – бұл жай ғана ғимарат емес. Бұл – болашақ ұрпақтың саулығына, өңірдің дамуына және белсенді, мықты қоғам қалыптастыруға бағытталған инвестиция. Мемлекет пен бизнестің бірлескен күш-жігерінің арқасында біз қаланың өмірінде маңызды орын алатын спорт орталығын салып жатырмыз”, – деді “АК Алтыналмас” АҚ Басқарма төрағасы Баламир Маханов.
Алтын өндіруші компания Степногор қаласында бірқатар әлеуметтік бастамаларды жүзеге асырған: аралас жекпе-жек залы жаңартылды, Ерте араласу орталығы ашылды, сондай-ақ Altynalmas MetLab зертханасы іске қосылды. Аталған нысандардың барлығы мемлекет меншігіне өтеусіз берілді.
“Алтыналмас” компаниясы мұндай жобалар тек күнделікті тұрмыс жағдайларын жақсартып қана қоймай, тұрақты қауымдастықтар құруға: білікті мамандарды тартуға, жастарды туған жерінде қалып, дамуға ынталандыруға және бизнес пен қоғам арасындағы байланысты нығайтуға мүмкіндік беретінін атап өтті.
Компанияның әлеуметтік бастамалары аясында салынған барлық нысандар мемлекет меншігіне қайтарымсыз негізде беріледі. “Алтыналмас” жаңа жобаларды жүзеге асыруды жалғастыруда, олардың бірқатары қазір іске асыру кезеңінде.
