Қырғызстанның Сыртқы істер министрлігі осы аптада ел парламентінде Алматыдағы «Алтын Орда» базарында жұмыс істейтін кәсіпкерлер туралы мәселе көтерілгенін хабарлады.
«Қырғыз Республикасының азаматтары — кәсіпкерлер өз заңды құқықтары мен мүдделерін қорғауды сұрады. Ұжымдық өтінішке тиісті деңгейде ден қою шаралары қабылданып жатыр. Тиісті өтініш (нота) СІМ-нің Алматыдағы өкілдігіне және Алматы облысы Қарасай аудандық полиция бөліміне жолданды. Алдағы күндері «Алтын Орда» сауда кешенінің басшылығымен кездесу жоспарланып отыр», — делінген хабарламада.
Естеріңізге сала кетейік, бұған дейін сот «Алтын Орда» базарының бұрынғы атқарушы директорына үкім шығарған болатын. Қырғызстаннан келген кәсіпкер Ермек Марқабаевқа аса ірі мөлшерде психотроптық затты заңсыз сақтады, тасымалдады деп (ҚР ҚК 296-бабының 4-бөлігі) айыптаған.
Іс материалдарына сәйкес, 2023 жылдың жазында «Алматы-Бішкек» автожолында полиция Марқабаевтың көлігін тоқтатып, жолаушылар отыратын жағын тексерген. Жеке тінту кезінде оның ішінде ұнтақ зат бар байлам табылып, тәркіленді деген болжам бар. Соттың мәліметінше, сараптама бұл психотропты зат – салмағы 1,796 грамм мефедрон екенін көрсетті.
«Алтын Орда» базарының бүкіл тарихы шулы, даулы істерімен белгілі. Екі мыңыншы жылдардың басынан бастап қылмыстар, жанжалдар көп болған. Кейін оны тұңғыш президенттің інісі Болат Назарбаев иеленгенін БАҚ жарыса жазған.
