Ақмола облысында сапалы білім беру мен спортты дамытуға жағдай жасау жұмыстары қарқынды жалғасуда. Соңғы бір жылда өңірде балалар мен жастарды қолдауға бағытталған әлеуметтік нысандар саны артып келеді. Соның бір мысалы – Степногорск қаласы, мұнда заманауи мектептер мен спорт кешендерін салу жобалары жүзеге асырылуда. Жұмыс сапары барысында облыс әкімі Марат Ахметжанов бірқатар нысандардағы құрылыс барысымен танысты, деп хабарлайды Todayinfo ақпараттық агенттігі.
Өңірлік саясаттың басым бағыттарының бірі – балаларды тұрғылықты жеріне қарамастан сапалы біліммен тең дәрежеде қамту. Облыс әкімі атап өткендей, аудандық және ауылдық елді мекендердің оқушылары да астана мен ірі қалалардағы балалар сияқты бірдей стандарттар бойынша білім алуы тиіс.
Осы орайда, Степногорск қаласына қарасты Бестөбе кентінде 300 орындық мектептің құрылысы аяқталуға жақын. Мектеп заманауи талаптарға сай салынып жатыр. Кешен құрамында оқу сыныптары мен зертханалар, спорт залы, оқу-өндірістік шеберханалар, кітапхана, акт залы ретінде қолдануға болатын трансформер сыныптар, сондай-ақ 110 орындық асхана қарастырылған. Нысанды 1 қыркүйекке дейін аяқтап, Білім күні оқушылар жаңа мектептің табалдырығын аттайды деп жоспарлануда. Сапар аясында Марат Ахметжанов кент әкіміне балаларды жарыстар мен олимпиадаларға апару үшін шағын автобус сыйға тартты.
Ақмола облысының құрылыс, сәулет және қала құрылысы басқармасы басшысының міндетін атқарушы Азамат Байқуанышева мәліметінше, мектеп құрылысы соңғы кезеңде тұр: технологиялық жабдықтарды орнату, ішкі әрлеу және аумақты абаттандыру жұмыстары жүргізілуде. Ғимараттың жалпы ауданы – 6,6 мың шаршы метрден асады.
Бестөбеде екі ірі спорт жобасы да жүзеге асырылуда. Біріншісі – 209 шаршы метр аумақтағы, 148 орынға есептелген ашық спорт кешені. Нысан құрамына футбол алаңы, жүгіру жолақтары және воркаут алаңы кіреді. «ГрадСтройСервис» ЖШС мердігерлік ұйымының мәліметінше, құрылыс биылғы жылдың 1 қазанына дейін аяқталады.
Екінші спорт нысанының құрылысы мерзімнің созылып кетуіне байланысты облыс әкімінің сынына ілікті.
«Біз бұл нысанға бірнеше рет келдік, мердігермен кездесіп, мерзімдерді және жұмысты жеделдету қажеттілігін талқыладық, алайда әлі күнге дейін нақты ілгерілеу жоқ. Қысқа мерзімде біз ауқымды жобаларды іске асырамыз, ал мұнда барлық уәделерге қарамастан жағдай өзгермей тұр. Егер көмек қажет болса, айтыңыздар – біз қосалқы мердігерлерді тартуға, техника мен адамдар беруге дайынбыз. Әйтпесе, біз шартты бұзып, компанияны адал емес мердігерлер тізіліміне енгізуге мәжбүр боламыз. Бұл жобаны аяқтау мүмкіндігі беріліп отыр, алайда оның орындалуын бақылау қатаң болады, – деп атап өтті», Марат Ахметжанов.
Әкім тиісті басқарма басшыларына мәселені ерекше бақылауда ұстап, мердігердің жұмысты бекітілген бюджеттен тыс түзетулерсіз және мерзімінде аяқтауын қамтамасыз етуді тапсырды
