Синьцзяндағы Іле қазақ автономиялық округінің Чапчал-Сибо ауданында ерекше мәдени шара өтті – Қытайдың Цзянсу провинциясы, ІҚАО және Қазақстаннан келген белгілі суретшілер бас қосып, табиғат аясында достық картинасын салды, деп хабарлайды Todayinfo.kz ақпарат агенттігі.
Шара «Керемет – бірлікте. Үйлесімді Іле» атты мәдени жобаның ресми бастауына арналды. Ұйымдастырушылар – ІҚАО Халық үкіметінің баспасөз қызметі. Алғашқы алаң ретінде Чапчалдағы түйе фермасы таңдалды.
Суретшілер тауға қарап, дала көрінісін кенепке түсірді. Олардың жұмыстарында майлы бояудың қанықтығы мен тушьтың нәзіктігі үйлесті. Қазақстандық суретші Виктория Цой:
«Мәдениетіміз бөлек болса да, ортақ таулар мен өзендерге қарап, жүрегіміз бірдей толқиды», – деді.
Қазақстандық суретші Мирлан Құлдыбаев:
«Тіпті біз үшін арнайы қылқаламдар дайындап қойған. Мұндай қамқорлық жүректі елжіретеді», – деп ризашылығын білдірді.
Қытайдың халық суретшісі Ян Мин:
«Қазақ әріптестеріміз батыл әрі ашық түстер қолданады, бұл Іледегі күзді еске салады. Ал қытай пейзажы ұстамды, таңғы Байшифэн секілді. Екеуі тоғысқанда жаңа рең пайда болады», – деді.
Бес күнге созылатын шара аясында суретшілер этюдтер жазып қана қоймай, бір-бірінің жұмыстарын талқылайды. Кейін Қазанчи этнотуристік аймағына, Люсинцзе көшесіне, Гоцзыгоу шатқалына және басқа да көрікті жерлерге барып, Іленің әлеуметтік-экономикалық дамуын бейнелейді.
ІҚАО Суретшілер қауымдастығы төрағасының орынбасары Ци Яфэн бұл жұмыстарды «қытай-қазақ достығының визуалды күнделігі» деп атады.
