«Қазпошта» АҚ жалақы, сыйақы және ашықтық саясатына қатысты Todayinfo ақпарат агенттігі жолдаған ресми сауалына жауап берді. Басшылық 2024 жылы сыйақы мен дивиденд алмаған.
«Қазпошта» акционерлік қоғамы қызметкерлердің жалақысы мен басқарушы құрамның сыйақысы туралы сұрақтарға жауап ретінде ресми түсініктеме жариялады.
2025 жылдың І тоқсанының қорытындысы бойынша, компания қызметкерлерінің орташа айлық жалақысы 262 346 теңгені құраған.
«Қазпошта» қызметкерлері «қарапайым» немесе «ерекше» деп бөлінбейді. Сұрыптаушылар, жүргізушілер, кассирлер, курьерлер және басқа мамандар бірдей қағидаттар бойынша ынталандырылады», – делінген хабарламада.
Компания бюджеттік мүмкіндіктерге қарай жалақыны жыл сайын индекстеу саясатын жүргізіп келеді:
- 2023 жылы – 7-25% аралығында,
- 2024 жылы – 15%,
- 2025 жылдың І тоқсанында – 5%-ға көтерілген.
2024 жылы Мәжілісте өткен тыңдалым барысында «Қазпошта» басқарма төрағасы Әсел Жанасова компания басшылығының сыйақы мен дивиденд алмайтынын ресми түрде мәлімдеген болатын. Бұл шешім қаржылық жағдай толық тұрақталғанға дейін сақталатыны айтылды.
Компания табысы келесі бағыттарға жұмсалуда:
- қызметкерлер жалақысын көтеру,
- бөлімшелерді жөндеу,
- автопаркті жаңарту,
- сұрыптау жүйесін оңтайландыру,
- инфрақұрылымды ұстап тұру.
Компания ашықтық қағидаттарын сақтай отырып, жыл сайынғы қаржылық есептілікті ресми ресурстарында жариялап келеді. Алайда жеке қызметкерлердің жалақысы мен сыйақысы ҚР «Жеке деректер және оларды қорғау туралы» заңына сәйкес құпия ақпарат болып табылады және жариялауға жатпайды.
«Қазпошта» АҚ өкілдерінің мәліметінше, барлық сұралған ақпарат заң аясында ұсынылған, ал жариялауға жатпайтын деректер жеке және коммерциялық құпияға байланысты таратылмайды.
