Қызылорда облысының әкімі Нұрлыбек Нәлібаев білім басқармасының басшысы Асқарбек Есжановты қызметінен неге босатпағанын түсіндірді. Бұл туралы Todayinfo.kz хабарлады.
Журналистердің брифингте қойған сұрақтарына жауап бере отырып, Нәлібаев облыста білім саласындағы оқиғаларға байланысты бірқатар жиындар өткізілгенін, оның ішінде Оқу-ағарту министрлігінің қатысуымен төрт ауданда тәрбие және білім саласын дамыту мәселелері талқыланғанын атап өтті.
«Өкінішке қарай, біздің өңірде осындай жағдайлар орын алды. Біз бұл турасында үлкен жиындар өткіздік… Сонда бұл мәселелер көтерілді. Одан кейін құқық қорғау органдарымен бірнеше рет жиындар өткізілді», — деді облыс әкімі.
Нәлібаевтің айтуынша, білім басқармасын біржақты қарауға болмайды, себебі олар білім саласын дамытуда да жұмыс істейді.
«Ол азамат осыған дейін де білім саласында қызмет істеген. Білім бөлімін басқарған. Мектепте басшы болған… Көп жауапкершіліктерді атқарған, тәжірибелі әріптестеріміздің бірі. Осындай бір-екі кемшілік алды деп әр басқарманың басшысын босата беретін болсақ, ол жерде адам қалмайды», — деді Нәлібаев.
Әкім Есжановқа екі рет қатаң сөгіс берілгенін, алдағы уақытта осындай оқиғалар тағы да орын алса, тиісті шешімдер қабылданатынын айтты.
