Қызылорда облысының білім басқармасы балаларды буллингтен, зорлық-зомбылықтан және суицидтен қорғау мақсатында ата-аналар мен педагогтерге арналған арнайы ақпараттық Telegram арнасын іске қосты. Бұл бастама өңірдегі кешенді жоспардың маңызды бөлігі ретінде қарастырылады және ата-аналардың бала тәрбиесіне белсенді қатысуын арттыруды көздейді, деп хабарлайды Todayinfo.
2024 жылдың ішінде ашылған Telegram арнасы бүгінде 23 463 ата-ананы қамтып отыр. Бұл ақпараттық арнада бала қауіпсіздігіне қатысты материалдар, мінез-құлықтағы өзгерістерді тану жолдары, педагогикалық кеңестер, сенім телефондарының тізімі, психологиялық көмекке жүгіну механизмдері тұрақты түрде жарияланады.
Ата-аналарға баланың суицидтік немесе девиантты мінез-құлық белгілерін ерте тану, көмекке жүгіну жолдары, эмоционалды қолдау көрсету тәсілдері үйретіледі. Сонымен қатар, Telegram арнасында балалық шақтың түрлі аспектілерін қамтитын «Вебинарлар сериясы» тұрақты түрде ұйымдастырылады. 2024–2025 жылдар аралығында ата-аналарға арналған 45 вебинар өткізілді. Бұл вебинарларда тәжірибелі психологтар мен педагогтер баланың дамуындағы күрделі мәселелерге тоқталып, нақты жағдайлар бойынша кеңестер береді.
Осы ақпараттық арнамен қатар, Қызылорда облыстық психологиялық қолдау орталығының Instagram және Facebook әлеуметтік желілеріндегі парақшалары да белсенді жұмыс істейді:
Ата-аналар мен педагогтерге арналған «Тағдыр сақшысы» атты оқыту бағдарламасы да осы жұмыс шеңберінде іске асырылады. Жылына кемінде бір рет өткізілетін бұл дәрістерде жасөспірімдердің психологиялық жай-күйін бақылау, дағдарыс белгілерін тану, шұғыл әрекет ету жолдары үйретіледі. Дәрістер интерактивті форматта өткізіліп, қатысушыларға нақты кейстер арқылы шешім қабылдау әдістемелері көрсетіледі.
Аталған ақпараттық қолдау арналарын іске қосу — қоғам мен мектеп арасындағы байланыс нығайтудағы маңызды қадам. Жаңа медианың мүмкіндіктерін пайдалану арқылы ата-аналар өз баласының психологиялық саулығын сақтауға белсенді қатыса алады.
