Фото:gov.kz
Ресей Федералдық қауіпсіздік қызметі Түмен облысы мен Қазақстан арасындағы шекараны нақтылауды бастады, , деп хабарлайды Тodayinfo ақпараттық порталы.
Ресей Федералдық қауіпсіздік қызметі Түмен облысы мен Қазақстан арасындағы шекараны нақтылау жұмыстарын жүргізуді ұйғарды.
Ресей Федерациясының нормативтік құқықтық актілер жобаларының ресми порталында «Түмен облысы аумағындағы шекаралық аймақтың шегін айқындау туралы» жобасы жарияланды. Жоба авторларының пікірінше, бұл шара шекараларды оңтайландыру және нақтылау үшін қажет.
«Құжат Түмен облысы аумағындағы Ресей мен Қазақстан арасындағы шекараның координаттарын анықтап, адамдардың өтуі мен көлік құралдарының шекаралық аймаққа кіруі үшін орындар мен уақытты белгілейді», — деп жазады «Ведомости» басылымы.
Ресей Федерациясындағы Түмен облысы Қазақстанның Солтүстік Қазақстан облысымен шектеседі. Шекарада Қазақстан жағындағы «Қызылжар» және Ресейдегі «Казанское» шекаралық өткелдері жұмыс істейді.
Айта кетейік, осындай рәсім былтыр қараша айында да өткізілген болатын. Сол кезде Ресей тарапы Қазақстанның солтүстігімен шектесетін Челябі облысындағы шекараны нақтылаған еді.
