Республика күні қарсаңында Наурызбай ауданының Шұғыла шағынауданында №202 жаңа балабақша ашылды. Мекеме 320 бүлдіршінге арналған, бүгінде мұнда 298 бала тәрбиеленіп жатыр , деп хабарлайды Todayinfo ақпараттық агенттігі.
Балабақшада үш ересек, екі кіші, үш орта, үш даярлық, бір аралас және бір арнайы топ жұмыс істейді. Жақын уақытта инновациялық кабинет ашылмақ. Балалардың жан-жақты дамуы үшін музыка және спорт залдары қарастырылған, сондай-ақ робототехника элементтері енгізіліп жатыр. Аулаға қауіпсіз жабынды төселген 13 ойын алаңы бар.
Жаңа балабақшаны қосқанда Наурызбай ауданында 6 мемлекеттік және 161 жекеменшік барлығы 167 балабақша жұмыс істеп тұр, онда 9 808 бала тәрбиеленіп жатыр.
Қазіргі уақытта ауданда тағы үш балабақша салынып жатыр: екеуі – 320 орындық «Нұрлы Дала» тұрғын кешенінде және Құрамыс шағынауданында, біреуі – 240 орындық Қалқаман шағынауданында.
Жаңа балабақшалардың ашылуы – Наурызбай ауданының кешенді дамуы мен бүлдіршіндердің сапалы білім алып, жайлы ортада тәрбиеленуіне бағытталған маңызды қадам.
