348 адамға несие алдыртқан: Банк қызметкерлері басқарған 3,7 млрд теңгелік ірі алаяқтық әшкереленді

Қазақстанның бірнеше ірі банктерінің қызметкерлері қатысқан ауқымды несие алаяқтығы туралы қылмыстық іс аяқталды. Ақмола облысының прокурорлары ұйымдасқан қылмыстық топқа қатысты тергеуді аяқтап, бұл топтың жалпы 3,7 миллиард теңге шығын келтіргенін анықтады. Тергеу мәліметі бойынша, 25 адамнан тұратын бұл қылмыстық топтың құрамында «Kaspi Bank», «Forte Bank», «Евразийский Банк», «Jusan bank» сияқты танымал қаржы институттарының қызметкерлері болған. Оған қоса, Қаржы нарығын реттеу және дамыту агенттігінің орталық аппаратының қызметкері де қатысқан. Олар 5 жылдан астам уақыт бойы әлеуметтік осал азаматтарды пайдаланып, олардың атынан 348 азаматқа ірі көлемде несие алдырған. Бұл несие алаяқтығы мемлекетке және қаржы жүйесіне орасан зор залал келтірген. Прокурорлар қылмыстық жолмен табылған мүлікті тәркілеу бойынша да жұмыс жүргізді. Тергеу барысында Алматыдағы пәтерлер, жер учаскелері, қымбат автокөліктер және ірі қолма-қол ақша анықталып, тәркіленді. Тәркіленген мүліктің жалпы құны – 2,7 миллиард теңге. Қазіргі уақытта топтың барлық мүшелері ұсталып, уақытша ұстау изоляторына қамалды. Қылмыстық істің құжаттары айыпталушыларға берілді. Іске қатысты соңғы шешімді сот шығарады. Қазақстандағы несие алаяқтығына қатысты бұл іс қоғамда үлкен резонанс тудырып отыр.