Жетісу облысының әкімі Бейбіт Исабаев тұрғындардың жеке мәселелерін тыңдады

Бүгін Жетісу облысының әкімі Бейбіт Исабаев азаматтарды жеке мәселелері бойынша қабылдау өткізді. Қабылдауға барлығы 8 адам жазылды. Қойылған сұрақтардың басым бөлігі тұрғын үй саласына қатысты болды. Атап айтқанда, мемлекеттік тұрғын үй қорынан баспана алу, заңдастыру, сондай-ақ бұрын алынған пәтерлерді жекешелендіру, – деп хабарлайды Todayinfo Жетісу ауданы әкімінің баспасөз қызметіне сілтеме жасап. Талдықорған қаласының тұрғыны, он баланың анасы Бәтес Сәдуақасова тұрғын үй кезегіне 2010 жылы тұрған. Көптен күткен пәтерді жылдың соңына дейін алатын болды. Мүмкіндігі шектеулі бала тәрбиелеп отырған Толқын Апухова да биыл қоныс тойын тойламақ. Кезекте тұрған қала тұрғынының қуанышына да аз уақыт қалды. Талдықорған қаласының тұрғыны Галина Абдрахмановаға бұрын мемлекеттік тұрғын үй қорынан алынған пәтерді жекешелендіруге қатысты тұрғын үй заңнамасы бойынша толық түсіндіру жұмысы жүргізілді. Ал Ескелді ауданының тұрғыны Назарбай Барменқұловтың қойған сұрақтары облыстық прокуратураның құзыретіне жататындықтан, қоғамдық қабылдауға келген азамат сұрақтары бойынша прокуратураға жүгінетін болды. Өтініш бергендердің барлығын тыңдаған облыс әкімі Бейбіт Исабаев тұрғындар сұрағына жан-жақты жауап беріп, жауапты мамандарға тиісті тапсырмалар берді.