Алматы облысында 10 жастағы бала үш метрлік әжетхана шұңқырынан бүлдіршінді құтқарып алды

Алматы облысы, Қарасай ауданы, Іргелі ауылында адам өмірін сақтап қалған нағыз ерлік оқиғасы тіркелді. Бұл туралы блогер Александр Цой жазды,деп хабарлайды Todayinfo. Үш жасар қыз бала тайып құлап, үш метр тереңдіктегі әжетхана шұңқырына түсіп кеткен. Анасы көмек сұрап айқайлаған кезде, оның даусын жақын маңдағы тұрғын - ер адам мен оның 10 жастағы ұлы Әлихан естіп, дереу көмекке ұмтылған. Алдымен ер адам өзі түспек болғанымен, бетон едендегі тесіктің тарлығы оған мүмкіндік бермеді. Сол сәтте Алихан өзі түсуді ұсынған. Әкесі баласын арқанмен белінен байлап, шұңқырға түсірген. Шұңқыр түбіне түскен Әлихан қыз баланы белінен арқанмен байлап, жоғарыға қарай жіберді. Артынша әкесі баласын да арқанмен қайта шығарып алды. Құтқару сәтінде ешкім жарақат алған жоқ. Екі баланы да дәрігерлер қарап шықты, қазіргі жағдайлары қанағаттанарлық, ешқандай қауіп жоқ.